Осорхонаи миллии Тоҷикистон дар ҳамкорӣ бо Вазорати мудофиаи Ҷумҳурии Тоҷикистон бахшида ба 24-солагии Рӯзи таъсисёбии Қувваҳои Мусаллаҳи Ҷумҳурии Тоҷикистон таҳти номи «Артиши миллӣ – зодаи Истиқлолияти давлатӣ» намоиш доир намуд.

Дар майдони намоишии ошёнаи якум муовини якуми директори Осорхонаи миллии Тоҷикистон Иброҳимзода Зафаршо низомиёни шуҷои Ватанро табрик намуд. Қайд гардид, ки Артиши миллӣ сипари боэътимоди Ватан мебошад.



Муовини вазири мудофиа Латифзода Асрор доир ба таъсисёбии Қувваҳои Мусаллаҳ маълумоти муфассал дода, аз ибтикороти роҳбарияти Осорхонаи миллии Тоҷикистон ҷиҳати ҳар сол ройгон қабул намудани низомиёни кишвар изҳори қаноатмандӣ ва арзи сипос намуд.

Сипас тарбиягирандагони кӯдакистонҳо ва хонандагони мактабҳои таҳсилоти миёнаи умумии пойтахт чорабинии ватандӯстонаи умумиҷумҳуриявиро бо қироати шеърҳо дар васфи Ватан ва родмардони он рангин гардониданд.

Дар намоиш беш аз 100 экспонат ба тамошо гузошта шуда, миёнҷои намоишгоҳ таърих ва фаъолияти Қувваҳои Мусаллаҳи Ҷумҳурии Тоҷикистон тавассути 2 васоити мултимерӣ намоиш дода шуд.

40 акси Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ҳамчун муассис ва поягузори Қувваҳои Мусаллаҳи Ҷумҳурии Тоҷикистонро суратгир Хусрав Аминов хеле барҷаста пешниҳод намуд. Ҳамзамон, расмҳо лаҳзаҳои хотирмони тамрин, истироҳат, савгандёдкунӣ, супоридани шаҳодатномаи ҳарбиро дар бар мегиранд.

Дар намоиш бузургтарин экспонат Парчами Ҷумҳурии Тоҷикистон маҳсуб меёбад, ки муаррифгари кишвари Тоҷикистон дар паради ҳарбӣ ба ифтихори 70-солагии Ғалаба дар Ҷанги Бузурги Ватанӣ (1941-1945) дар шаҳри Москваи Федератсияи Русия ва Ҷопон мебошад.



Дар намоиш аксҳо аз лаҳзаҳои вохӯрии Генерали Артиш, Сарфармондеҳи Қувваҳои Мусаллаҳ Эмомалӣ Раҳмон бо низомиён, собиқадорони ҷангу меҳнат, боздид аз Донишкадаи ҳарбӣ ва машқҳои ҳарбии муштараки низомиёни Иттиҳоди Давлатҳои Мустақил хотирмону ибратбахшанд.

Инчунин 40 туҳфаи Қувваҳои Мусаллаҳи давлатҳои Ҳиндустон, Қазоқистон, Беларус, Федератсияи Русия, Чин ба Қувваҳои Мусаллаҳи Ҷумҳурии Тоҷикистон дар намоишгоҳ ҷойгоҳи алоҳида дошта, диққати ҳар бинандаро ҷалб месозад.

Бахшида ба 24-солагии Артиши Миллии Ҷумҳурии Тоҷикистон роҳбарияти Осорхонаи миллии Тоҷикистон тасмим гирифт, то ба 2000 афсару сарбози кишвар ройгон хизмат расонад. Намоишгоҳ 21 ферал оғоз гардид ва то 24 феврал идома меёбад.

Дар ин бора Шаҳло Абдуллоева, корманди калони илмии Осорхонаи миллии Тоҷикистон иттилоъ дод.