Санъати мусиқии тоҷик ҳанӯз аз замони ромишгари мумтоз Борбади Марвазӣ дар марҳилаи рушд буда, идомадиҳандагонаш онро то замони мо расонидаанд. Имрӯз кам нестанд ҷавононе, ки ба маҷрои ҳунар ворид шуда, ҳамчун идомадиҳандаи санъати мусиқии тоҷик баҳри халқу миллат ва ҳаводорони жанрҳои мусиқӣ суруду таронаҳо месароянд. Ҳаётҷон Ҳамрохонов, сарояндаи ансамбли эстрадии “Гулшан” аз зумраи ҷавононест, ки дар жанрҳои мусиқии классик ва муосири тоҷик маҳорати худро санҷида, аз ҷониби санъаткорони касбӣ баҳои баланд гирифтааст. Аз боби ҳунари сарояндагӣ суҳбате доштем бо ин навниҳоли боғи санъати тоҷик.

- Дар ибтидои суҳбат мехостем, барои хонандагони мо аз лаҳзаҳои аввали рӯи саҳна қадам ниҳоданатон каме ёдовар шавед.

- Бори аввал ҳангоми таҳсил дар синфи якум дар иди алифбо суруд хонда будам. Ин суруд қадамҳои аввалини ман дар роҳи санъат гардид. Суруди сароидаам аз ҷониби омӯзгорон баҳои баланд гирифта, онҳо тавсия доданд, ки дар мактаби санъати бачагонаи шаҳри Ҳисор таҳсиламро идома диҳам. Ман низ ҳуҷҷатҳоямро ба ин боргоҳи санъат супорида, тӯли 2 сол дар назди Суҳбатулло Шарипов нозукиҳои таронаҳои халқиро омӯхтам. Баъдан, дар синфи сеюм таҳсил мекардам, устодони ин боргоҳи ҳунар маро барои идомаи таҳсил ба мактаб-интернати миёнаи махсуси ҷумҳуриявӣ ба номи Миратулло Атоев роҳнамоӣ карданд. Аз синфи 3 то синфи 11 дар мактаби мазкур таҳти роҳбарии Ҷамшед Эргашев ва Тоҷиддин Раҳимов таҳсил намуда, нозукиҳои жанри классикии шашмақомро омӯхтам. Илова бар ин дар баробари сарояндагӣ кӯшиш намудам, ки навохтани асбобҳои мусиқиро то ҳади имкон ёд гирам. Аввалин асбоби мусиқии омӯхтаам фортопиано мебошад, ки бо роҳнамоии Фирӯза Саъдулоевна тӯли 7 сол навохтани ин сози мусиқиро пурра омӯхтам.

- Аввалин суруде, ки Ҳаётҷонро ба мухлисон ошно намуд кадом буд ва он чӣ гуна тавлид гашт?

- Аввалин суруде, ки маро ба мухлисону ҳаводорони созу суруд ошно намуд, ин суруди халқӣ буд, ки бо кӯмаки устодам Бахтиёр Иброҳимов дар даври ниҳоии барномаи телевизионии “Парвин” сароида будам. Ногуфта намонад, ки Бахтиёр Иброҳимов дар жанри эстрада устоди ман буда, тарзи дуруст сароидани суруд ва чӣ гуна баромад намудан дар саҳнаро бароям омӯзонд.

- Дар Консерваторияи миллии Тоҷикистон дар жанри академӣ таҳсил кардед. Чаро маҳз ин жанри мусиқиро интихоб намудед?

- Ҳангоми таҳсил дар мактаб-интернати мусиқӣ то қадри имкон сароидани дигар жанрҳои мусиқиро омӯхта будам ва тасмим гирифтам, ки дар жанри академӣ маҳорати худро санҷам. Чунки жанри академӣ миёни жанрҳои мусиқии ғарб мақоми хос дошта, на ҳар сароянда аз уҳдаи сароидани ин жанр мебарояд. Аз ин лиҳоз, завқи ман нисбат ба омӯхтани ин жанри мусиқӣ бештар гардид. Ҳамин тавр, тӯли 5 сол дар консерватория таҳсил намудам. Ҳангоми таҳсил таҳти роҳбарии Содиқ Нуруллоев аз нозукиҳои жанри академӣ огаҳӣ пайдо карда, дар чандин чорабиниҳои ҷумҳуриявию байналмилалӣ сурудҳои операвиро сароидаам.

- Озмуни “Бозиҳои делфинӣ”-и Федератсияи Русия, ниҳоят довталаби зиёд дорад ва на ҳар кас метавонад ба он роҳ ёбад. Ба шумо чӣ гуна даст дод, ки дар ин озмун ширкат кунед ва бо кадом суруд Тоҷикистонро муаррифӣ намудед?

- Соли 2019 баъд аз ғолиб омадан дар озмуни ҷумҳуриявии “Тоҷикистон - Ватани азизи ман”, ба ман муяссар гардид, ки ба озмуни “Бозиҳои делфинӣ” роҳхат ёбам. Дар ин озмун 5 нафар аз дастаҳои ҳунарии Тоҷикистон иштирок намудем. Аввалин иштирокчӣ аз Тоҷикистон дар ин озмун ман будам ва бо сароидани суруди “Ошиқи духтари маҳпора шудам”, бо забони русӣ, аз ҷониби ҳакамон баҳои баланд гирифтам. Чуноне ки ҳамагон медонанд, жанри академӣ дар Русия ниҳоят машҳур буда, ҳунармандони касбии ин жанр ба тамоми ҷузъиёт аҳамият медиҳанд.

- Идеал дар зиндагӣ барои нафаре, ки дар дилхоҳ соҳа қадамҳои аввалро мегузорад нақши калидӣ дорад. Идеали шумо дар ҷодаи санъат кист?

- Ман аз уҳдаи сароидани якчанд жанрҳои мусиқӣ мебароям. Ногуфта намонад, ки дар ҳар як жанри мусиқӣ ман идеали худро дорам. Аз сарояндагони ватанӣ идеалҳои ман Тоҷиддин Раҳимов, Ҷамшед Эргашев, Бахтиёр Иброҳимов ва Содиқ Нуруллоев мебошанд. Аз сарояндагони аврупоӣ бошад, идеали ман дар ҷодаи санъат сарояндаи итолёвӣ Тото Кутунё аст, ки дар жанри эстрадӣ маҳорати фавқулода дорад. Аз ин лиҳоз ман санъати ӯро ниҳоят қадр намуда ба ӯ пайравӣ мекунам.

- Имрӯзҳо зиёд ҳолатҳое мушоҳида мегардад, ки сарояндаҳои ҷавонро зери тозиёнаи танқид қарор медиҳанд, ки аз эҷодиёти классиконамон суруд намесароянду доираи мутолиаашон маҳдуд аст ва ё таваҷҷуҳ ба санъати бегона доранд. Шумо аз эҷодиёти устодони санъати тоҷик кадом сурудро месароед?

- Пеш аз оне, ки сурудеро дар дилхоҳ жанр сабт намоям ва ё сароям, аз устодони худ маслиҳат мепурсам, ки оё касбияти ман ба сароидани ин суруд мерасад ё не? Ҳангоме дар мактаб-интернат таҳсил менамудам, бештар сурудҳои халқиро месароидам. Сурудҳои устод Акашариф Ҷӯраев, Зафар Нозимов ва дигар устодони зиндаёди санъатро месароям.

- Ҳамчун сарояндаи ҷавон кадом роҳҳои аз ин ҳам зиёдтар рушд намудани санъати тоҷикро ба хонандаи мо пешниҳод мекунед?

- Барои рушд намудани санъати асили миллии тоҷик пеш аз ҳама дар вуҷуди ҳунарманд завқ ва истеъдоди Худодод бояд бошад. Чунки истеъдодро сохтан ғайриимкон аст. Дар замони кунунӣ бо ҳар роҳу воситаи техникӣ, албатта метавон садо ва сурудро сохт. Аммо сохтакорӣ сарояндаро ба дуриҳо расонида наметавонад. Истеъдоди қалбакӣ ҳатман рӯзе нурафшониашро бозмедорад. Агар истеъдод табиӣ бошаду санъаткор сидқан болои худ кор кунад, ҳатман ба қуллаи мақсуд мерасад. Ба андешаи ман барои рушд намудани санъати овозхонӣ дар кишвар, аввал завқ, баъдан истеъдоди асил доштани ҳар сароянда боис шуда метавонад.

PS: Хонандагони азиз, шумо метавонед шакли видеоии мусоҳибаро бо иҷроиши ҷаззобтарин сурудҳо аз ютубканали рӯзномаи “Ҷавонони Тоҷикистон” - javonon.tv тамошо кунед.