Бо ибтикори Федератсияи иттифоқҳои касабаи мустақили Тоҷикистон дар ҳамкорӣ бо Ташкилоти байналмилалии меҳнат, Вазорати меҳнат, муҳоҷират ва шуғли аҳолии Ҷумҳурии Тоҷикистон, МИҲД-и вилояти Хатлон ва шаҳри Қӯрғонтеппа, 25 июл дар бозори “Ҳоҷӣ Шариф”-и шаҳр таҳти унвони “Аз соя ба нур” барномаи театрӣ намоиш дода шуд.

Барнома панҷ намоишномаи кӯтоҳмуддати театриро дар мавзуъҳои меҳнат, муҳоҷират, муносибати корманд ва корфармо, нафақа ва масъалаҳои вобаста ба он, талаботи Кодекси меҳнат, фаъолияти ғайррасмӣ ва ғайраро дар бар гирифта, мақсад амалигардии Барномаи давлатии пешгирии шуғли ғайрирасмӣ дар Ҷумҳурии Тоҷикистон мебошад.

Намоишномаҳо аз ҷониби ҳунармандони Театри давлатии ҷавонони Тоҷикистон ба номи Маҳмудҷон Воҳидов офарида шуд, ки дар он ҳунармандони шинохта Шодӣ Солеҳ, Насриддини Нуриддин, Моҳпайкар Ёрова ва дигарон ҳунарнамоӣ карданд.

Тавре ки намояндаи Федератсияи иттифоқҳои касабаи мустақили Тоҷикистон А. Ризоев иброз дошт, барномаи “Аз соя ба нур” маҳз ба он хотир миёни омма дар бозор намоиш дода шуд, ки дар ин ҷо аксарият ба шуғли ғайрирасмӣ машғуланд. Мо ба воситаи ин намоишнома ба онҳо гуфтанием, ки аз соя ба нур бароянду ба тариқи бастани шартномаи меҳнатӣ, расман фаъолияташонро ба роҳ монанд.

Баъди ба поён расидани намоиш миёни мутахассисон ва тамошогарон пурсишу посух ва таҳлили саҳнаҳо сурат гирифт.



Умед МИРЗОЕВ, “ҶТ”