Дирӯз - 13 ноябр дар Филармонияи давлатии Тоҷикистон ба номи Акашариф Ҷӯраев маросими рӯнамоии китоби “Чеҳраи миллат” доир гардид. Ин китоб ба ифтихори Рӯзи Президенти Ҷумҳурии Тоҷикистон бо ташаббуси Вазорати фарҳанги Ҷумҳурии Тоҷикистон ва Кумитаи кор бо ҷавонон ва варзиши назди Ҳукумати Ҷумҳурии Тоҷикистон таҳия шудааст.

Дар чорабинӣ Абдулло Раҳмонзода, Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, Зулфиқор Гулаҳмадзода, Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Сафарзода Давлат, муовини вазири фарҳанг, Низом Қосим, раиси Иттифоқи нависандагони Тоҷикистон шоирону нависандагони саршиноси кишвар, аҳли адабу фарҳанг ва ҷавонони фаъол ширкат доштанд.

Абдулло Раҳмонзода дар баромади худ зикр кард, ки ҳар як ҷавони тоҷик бояд аз таърих, тамаддун ва қаҳрамонони миллати хеш огоҳ бошад ва ба қадри ободиву осоиштагие, ки Президенти маҳбуби кишвар муҳтарам, Эмомалӣ Раҳмон барои миллат фароҳам овардаанд, бирасад.

Ҳамчунин Зулфиқор Гулаҳмадзода, раиси Кумитаи кор бо ҷавонон ва варзиш, зимни суханронӣ таъкид, ки эътимоди Пешвои миллат ба ҷавонон хеле бузург аст ва ҷавонон низ бояд сазовори ин боварӣ бошанд, ҳамеша бо эҳсоси масъулият ва садоқат супоришҳои Сарвари давлатро иҷро намоянд.

Лозим ба зикр аст, ки “Чеҳраи миллат” аз чор ҷилд иборат буда, дар он осори чор Шоири халқии Тоҷикистон монанди Низом Қосим, Муҳаммад Ғоиб, Камол Насрулло ва Давлат Сафар ҷамъоварӣ шудаанд.

Дар фарҷом ҳунармандон бо таронаҳои ватандӯстона аз ашъори шоирон табъи ҳозиринро хуш гардониданд.

Гулафшон КАРИМОВА,“ҶТ”