Донишкадаи давлатии санъати тасвирӣ ва дизайни Тоҷикистон дар чор соли фаъолият бо Донишкадаи бадеии давлатӣ ва Донишкадаи бадеӣ-саноатии шаҳри Маскави Федератсия Русия, Донишкадаи ҳунари Эрон ва Донишгоҳи давлатии Олтой ҷиҳати дар сатҳи баланд омода намудани мутахассисон ва таҳияи намудани барномаҳои таълимӣ шартномаи дутарафа дорад.  

Ғанизода Ҷамшед, ректори донишкадаи мазкур зимни нишасти матбуотӣ иброз дошт, ки “Бо мақсади тайёр намудани кадрҳои баландихтисоси соҳаи санъати тасвирӣ, дизайн, рушди ҳамкорӣ бо донишгоҳҳои хориҷӣ, аз ҷумла Федератсияи Русия, Беларус, Украина, Қазоқистон ва ғайра ҳамкорӣ ба роҳ монда шудааст”.

Ба гуфтаи Ҷамшед Ғанизода, Донишкадаи давлатии санъати тасвирӣ ва дизайн барои таҳсили донишҷӯёни хориҷӣ дар донишкада низ шартномаҳо дорад: “Ҳоло дар донишкадаи мо се нафар аз Ҷумҳурии Афғонистон таҳсил доранд”, - гуфт ӯ.

Мавсуф зикр намуд, ки: “Мо боварӣ дорем, ки ин теъдод сол аз сол рӯ ба зиёдшавӣ меорад. Сабаби кам будани муҳассилин аз дигар давлатҳо дар он аст, ки донишкада фаъолияти начадон зиёд дорад ва аз таъсисёбии он ҳама огоҳ нест”.

Донишкадаи давлатии санъати тасвирӣ ва дизайни Тоҷикистон тибқи Қарори Ҳукумати Ҷумҳурии Тоҷикистон аз 30 марти соли 2013 ташкил шуд. Дар донишкада аз рӯи 26 равияи тахассусӣ устодони варзидаи санъати тасвирии ҷумҳурӣ ба донишҷӯён дарс мегӯянд.

Хуршед МАВЛОНОВ, "ҶТ"