20 августи соли 2024 дар толори Мақомоти иҷроияи ҳокимияти давлатии шаҳри Хоруғи ВМКБ озмуни даври вилоятии "Фурӯғи субҳи доноӣ китоб аст" оғоз гардид.

Дар рафти кушодашавии озмун Н. Асламшоева, муовини раиси Вилояти Мухтори Кӯҳистони Бадахшон, Амир Иброҳимзода, сардори Раёсати тарбияи ватандӯстии дастгоҳи марказии Кумитаи кор бо ҷавонон ва варзиши назди Ҳукумати Ҷумҳурии Тоҷикистон иштирок ва суханронӣ намуда, иброз доштанд, ки дар заминаи дастгириву ғамхорӣ ва таваҷҷуҳи доимии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон озмунҳои сатҳи ҷумҳуриявӣ ташкил ва гузаронида шуда, сокинони кишвар, бахусус наврасону ҷавонон имконият доранд сатҳи донишу маърифат ва лаёқати худро баланд бардошта, бо ба даст овардани ҷойҳои намоён соҳиби мукофотҳои пулӣ гарданд.

Аз ҷониби маърӯзачиён гуфта шуд, ки озмуни ҷумҳуриявии "Фурӯғи субҳи доноӣ китоб аст" таҳти сарпарастии Пешвои миллат доир гардида, ҳадафи баргузории озмуни баланд бардоштани завқи китобхонӣ, тақвияти неруи зеҳнӣ, дарёфти чеҳраҳои нави суханвару сухандон, арҷгузорӣ ба арзишҳои милливу фарҳангӣ, инкишофи қобилияти эҷодӣ, таҳкими эҳсоси худогоҳиву худшиносӣ, такмили захираи луғавӣ, тақвияти ҷаҳони маънавӣ миёни аҳолии кишвар кишвар мебошад.

Дар фарҷом ҳайати комиссияи озмун тибқи рӯйхати тасдиқгардида аз ҳисоби омӯзгорони донишманду соҳибтаҷриба барои довталабон шинос карда шуданд.

Мавриди зикр аст, ки ғолибони озмун омӯзгорон, волидайне, ки шогирдону фарзандонашон дар даври ҷумҳуриявии озмун барандаи ҷоизаҳо шуда, бо туҳфаҳои моддиву маънавӣ ҳавасманд гардонида мешаванд.