Иттифоқи журналистони Тоҷикистон рӯзи 12 феврал барандагони Ҷоизаи ба номи Абулқосим Лоҳутиро дар чорабиние бахшида ба Рӯзи матбуот эълон намуд.

Дар Театри давлатии академии драмавии ба номи Абулқосим Лоҳутӣ дар чорабинии бахшида ба Рӯзи матбуот ин Ҷоиза дар бахши телевизион ба Бахтиёр Сафаров, дар бахши радио ба Баҳринисо Маҷидова ва Махфират Носирзода, барои маводи илмӣ-таҳқиқотӣ ба Ҷамила Раҳмонова ва Бахтиёр Қутбиддинов ва дар бахши матбуот ба Фахриддини Холбек, Абдулқодири Раҳим, Асалмоҳ Назарова, Ҳотами Ҳомид ва Карим Шариф дода шуд.

Инчунин, ба ҳафт нафар хабарнигори ҷавон, Ҳафизуллоҳ Тоҳирӣ, Комрони Сафар, Лола Ризоева, Нуралӣ Карим, Суннатулло Имомов, Саодат Розиқзода ва хабарнигори рӯзномаи “Ҷавонони Тоҷикистон” Меҳрубон Имомова Ҷоизаи ба номи Воҳид Асрорӣ тақдим гардид.

Дар ин маросим ҷоизаи алоҳидаи Академияи ВАО дар ҳамкорӣ бо Иттифоқи журналистони Тоҷикистон ба чанде аз расонаҳои хабарӣ дода шуд. Аз ҷумла “Озодагон” “Ҳафтаномаи сол”, “ТВ Варзиш” “Телевизиони сол”, “Имрӯз” “Радиои сол”, АМИТ “Ховар” “Оҷонсии сол”, “Садои шарқ” “Маҷаллаи сол” ва Нуралӣ Давлат - коршиноси сол эълон гардид.

Дар доираи таҷлил аз Рӯзи матбуот ба чанде аз собиқадорони матбуоти тоҷик мукофотҳои пулӣ тақдим карда шуд.