Кумитаи забон ва истилоҳоти назди Ҳукумати Ҷумҳурии Тоҷикистон ҷиҳати тоҷикикунонии номи деҳот, мағозаҳо, кошонаҳои ҳусн, ошхонаҳову тарабхонаҳо ва дигар номҳои хориҷибуда аз тамоми имкониятҳои мавҷуда истифода мебарад. Дар ин бора имрӯз - 30 январ Рамутуллозода Сахидод, раиси Кумита зимни нишасти матбуотӣ иттилоъ дод.

Ба гуфтаи ӯ, танҳо дар соли 2025 Кумита аз лиҳози экспертизаи забоншиносӣ ва танзими истилоҳот ба номгузории 15 муассисаю ташкилот ва ҷамъиятҳо хулоса пешниҳод намудааст. Аз ҷумла, хулосаҳо ба номгузории 6 муассисаи таълимию маркази омӯзишӣ, 1 варзишгоҳ, 6 ҷамъияти дорои масъулияташ маҳдуд, 1 ҷамъияти саҳомии пӯшида ва 1 толори ороиш марбут мебошанд.

Ҳамзамон, таъкид гардид, ки дар самти номгузории маҳалҳои аҳолинишин низ фаъолияти Кумита идома дорад. Агар Кумита дар соли 2024 ба 35 номи маҳалли аҳолинишин хулоса пешниҳод шуда бошад, пас дар соли 2025 ин нишондиҳанда ба 7 адад расидааст. Ба гуфтаи масъулин, дар муқоиса бо ҳамин давраи соли гузашта шумораи муроҷиатҳои воридшуда аз ҷониби мақомоти иҷроияи маҳаллии ҳокимияти давлатии шаҳру ноҳияҳои ҷумҳурӣ 28 адад ё тақрибан 19% кам гардидааст.

Бо вуҷуди ин, бояд изҳор дошт, ки то ҳол ғайритоҷикӣ ва нофаҳмо будани номи бисёре аз марказҳои савдо, кошонаҳои ҳусн ва ошхонаҳо ҳамчун як мушкили ҷиддӣ боқӣ мемонад. Кумитаи забон ва истилоҳот ният дорад дар ҳамкорӣ бо сохторҳои дахлдор ва мақомоти маҳаллӣ ҷиҳати ҳифзи меъёрҳои забони давлатӣ ва тарғиби номгузории тоҷикона чораҳои иловагӣ андешад.

Ба таъкиди масъулин, татбиқи пайвастаи сиёсати давлатии забон ва назорати ҷиддии раванди номгузорӣ метавонад ба таҳкими мақоми забони тоҷикӣ ва боло рафтани фарҳанги номгузорӣ дар ҷомеа мусоидат намояд.

Яҳё МАҲМАДНАБИЕВ, “ҶТ”