Дар доираи ҳамкориҳои дуҷонибаи синамогарони Тоҷикистону Ӯзбекистон дар нимсолаи дуюми соли 2024 таҳия ва банаворгирии филми муштараки ҳунарии “Дурахши ахтарон - Ҷомӣ ва Навоӣ”, ки бо ташаббуси бевоситаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таҳия ва наворбардорӣ шудаистодааст, ба анҷом хоҳад расид.

Ин нуктаро имрӯз - 30 июл Маҳмадсаид Шоҳиён, директори Муассисаи давлатии "Тоҷикфилм" зимни нишасти матбуотӣ баён намуд.

Ҳамзамон, дар “Тоҷикфилм” таҳия ва наворбардории филмҳои ҳунарии “Суқут дар кӯҳҳо” ва “Харгуши сиёҳ - харгӯши сафед” ба нақша гирифта шудааст. Моҳи сентябр бошад, дар ҳамкорӣ бо студияи “Русское поле” наворбардории филми ҳунарии “Василий Тёркин” шуруъ хоҳад шуд.

Шоҳиён дар масъалаи сатҳу сифати филмҳои тоҷикӣ, ки бештари мавридҳо аз ҷониби бинандагон мавриди накӯҳиш қарор мегиранд, гуфт ин ба тавоноии мутахаасисону филмофарон вобаста аст.

- Агар сатҳи касбияти мутахассисони соҳа баланд бошад, мо метавонем ки филмҳои ҷавобгӯ ба ҳама талаботҳои соҳаи синаморо таҳия ва манзури бинанда гардонем. Бо ин мақсад Тоҷикфилм ҷиҳати тайёр намудани кадрҳои баландихтисоси соҳа кӯшиш ба харҷ медиҳад, - гуфт М.Шоҳиён.