Директори Муассисаи давлатии "Тоҷикфилм" имрӯз - 4 феврал зимни нишасти матбуотии ниҳоди зери идорааш гуфт, ки ҳоло филми "Дурахши ахтарон: Ҷомӣ ва Навоӣ” ба навор гирифта нашудааст.

Ба гуфтаи ӯ мувофиқи нақшаҳои тасдиқгардида миёни Муассисаи давлатии "Тоҷикфилм" ва "Узбекфилм" рафти ба навор гирифтани филми "Дурахши ахтарон: Ҷомӣ ва Навоӣ” пас аз ҷашни Наврӯз оғоз хоҳад шуд.

Тавре Маҳмадсаид Шоҳиён зикр кард, филми мазкур дар соли 2025 пурра ба навор гирифта шуда, дар аввали соли 2026 ба намоиш гузошта хоҳад шуд. Номбурда ҳамчунин қайд кард, ки маблағгузорӣ ва тамоми хароҷоти филм миёни Муассисаи давлатии “Тоҷикфилм” ва “Узбекфилм” баробар тақсим шуда, манфиатҳои ҳарду давлат ба инобат гирифта мешавад.

Бояд гуфт, ки филми “Дурахши ахтарон: Ҷомӣ ва Навоӣ” дар доираи ҳамкориҳои дуҷонибаи синамогарони Тоҷикистону Ӯзбекистон таҳия мегардад. Ин филм бо ташаббуси бевоситаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таҳия ва наворбардорӣ бояд шавад.

Ҳошим РАҲМАТУЛЛОЕВ, "ҶТ"