Соли 2024 ҷиҳати саноатикунонии босуръати кишвар ва таъмини талаботи бозор бо маҳсулоти рақобатпазири ватанӣ ба кор андохтани иқтидорҳои нав, истифодаи пурраи иқтидорҳои истеҳсолӣ ва содиротӣ, инчунин таъсиси ҷойҳо нави корӣ дар Вазорати рушди иқтисод ва савдои кишвар як қатор тадбирҳо амалӣ гардидааст.

Дар ин бора имрӯз - 11 феврал Завқӣ Завқизода, вазири рушди иқтисод ва савдо зимни нишасти матбуотӣ иттилоъ дод.

Ба гуфтаи номбурда дар ин давра дар қаламрави кишвар 740 корхонаву коргоҳҳои нави истеҳсолӣ, аз ҷумла 528 корхонаи нави саноатӣ бо таъсиси наздики 20 ҳазор ҷойи кории нав мавриди истифода қарор дода шуд.

Ҳамчунин зикр гардид, ки Вазорат дар соли 2024 ҷиҳати таъмини рушди соҳаҳои иҷтимоию иқтисодӣ як қатор лоиҳаҳои санадҳои меъёрии ҳуқуқиро таҳия намуд, ки 16 лоиҳа қабул гардида, 6 лоиҳа дар баррасии Ҳукумати ҷумҳурӣ ва 15 лоиҳа дар баррасии вазорату идораҳои дахлдор қарор доранд.

Наҷиба МУРОДБЕКОВА, "ҶТ"