Дар вилояти Хатлон ба ҳолати оғози ноябри соли равон маблағи наздик ба 22 млрд сомонӣ маҳсулот истеҳсол кардаанд. Дар ин бора маркази матбуоти ҳукумати вилояти Хатлон иттилоъ медиҳад.

Бино ба иттилои манбаъ, дар ҳамаи шаклҳои хоҷагидории вилоят ҳаҷми маҳсулоти тавлидкарда ба 21 млрду 832 млн сомонӣ расидааст.

Таъкид шудааст, ки ин нишондиҳанда дар муқоиса бо ҳамин давраи соли гузашта 6,3% ва ё 1,3 млрд сомонӣ бештар мебошад.

Ҳамзамон, иттилоъ дода шудааст, ки ба ҳолати аввали ноябри соли равон дар ҳамаи бахшҳои хоҷагидории соҳаи растанипарварӣ дар Хатлон дар муқоиса ба ҳамин давраи соли гузашта мутаносибан истеҳсоли ғалладона 106,4%, сабзавот 106,6%, полезӣ 104,6%, мевагиҳо 109,3%, ангур 110,8% ва ниҳолу кӯчат 123%-ро ташкил медиҳад.

Қаблан Президенти Ҷумҳурии Тоҷикистон муҳтарам Эмомалӣ Раҳмон зимни боздид аз вилоят дар ноҳияи Данғара ҳушдор дода буданд, ки: “мувофиқи арзёбии Ташкилоти озуқаворӣ ва кишоварзӣ вазъи ҷаҳон имсол ва соли 2023 боз ҳам вазнинтар шуда, шумораи одамоне, ки ба хатари гуруснагӣ дучор мешаванд, ба 220 миллион нафар баробар мегардад”.

Сарвари давалт аз масъулини сокинони кишвар даъват намуда буданд, ки ҳар қитъа заминро самаранок истифода баранд.

Таъкид шуда буд, ки дар вилояти Хатлон имконият нисбат ба дигар минтақаҳои мамлакат дар бахши кишоварзӣ фаровонтар буда, минтақа метавонад дар самти ҳифзи амнияти озуқавории кишвар ва таъмин намудани бозори дохилӣ саҳм гузорад.