ИҚТИСОД
Сешанбе 24 Январ 2017 01:57
427

Зокирзода Маҳмадтоир, вазири кишоварзии ҷумҳурӣ дар нишасти матбуотӣ соли 2015-ро соли бобарор ва пурфайзу баракат хонда, афзуд, ки бо мусоид омадани боду ҳаво деҳқонони кишвар ҳосили хуб гирифтанд.


Вазир истеҳсоли ангурро мисол оварда, зикр кард, ки аз аввали мавсим дар бозорҳои ҷумҳурӣ нархи ангур нисбат ба солҳои пеш то ду баробар арзонтар ба фурӯш гузошта шуд. “Соли 2015, аз ҳама бахшҳои хоҷагидории ҷумҳурӣ 203 ҳазору 771 тонна ангур ҳосил шудааст, ки нисбат ба соли 2014 14 ҳазору 28 тонна зиёд мебошад. Ҳосили хуби ангур боис гашт, ки соли гузашта умуман аз хориҷ ба кишвар ангур ворид нашавад”, - афзуд М. Зокирзода.


М. Зокирзода таъкид кард, ки воридоти мевагиҳо аз хориҷи кишвар ба бозорҳои ҷумҳурӣ нисбат ба се соли пеш кам гашта, 42 ҳазор тоннаро ташкил додааст. 


Гуфта шуд, ки соли гузашта ба кишварҳои ИДМ 33 ҳазор тонна мева интиқол ёфтааст, ки аз ин 22 ҳазор тоннаашро ангур ташкил медиҳад.


Дар посух ба суоли хабарнигорон ҷиҳати талаф ёфтани ангур дар кишвар вазири кишоварзӣ чунин гуфт:

- Соли гузашта дар кишвар ангур талаф наёфт, чунки мо имрӯз нигоҳубини ангурро дар ҷумҳурӣ хуб ба роҳ мондаем. Дар ноҳияи Ҳисор сардхонаҳое сохта шудаанд, ки аз 500 то 3000 тонна ангурро дар онҳо метавонем нигоҳдорӣ кунем.

Эзоҳи худро нависед



Рамзҳо дар расм