Дар соли 2025 нисбати се мақомдори давлатӣ барои риоя накардани талаботи Қонуни Ҷумҳурии Тоҷикистон “Дар бораи танзими анъана ва ҷашну маросим” ҷазои маъмурӣ татбиқ гардидааст.

Дар ин бора имрӯз раиси Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон Сулаймон Давлатзода дар нишасти матбуотӣ иттилоъ дод.

Ба гуфтаи ӯ, дар давраи ҳисоботӣ дар саросари ҷумҳурӣ ҳамагӣ 112 ҳазору 946 маърака ва маросим ба қайд гирифта шудааст. Аз ин шумора 1 ҳазору 912 маърака дар Вилояти Мухтори Кӯҳистони Бадахшон, 24 ҳазору 716 дар вилояти Суғд, 46 ҳазору 514 дар вилояти Хатлон, 14 ҳазору 625 дар шаҳри Душанбе ва 25 ҳазору 179 маърака дар шаҳру ноҳияҳои тобеи ҷумҳурӣ баргузор шудааст.

Зикр гардид, ки шумораи умумии маъракаю маросимҳо нисбат ба ҳамин давраи соли гузашта 1 ҳазору 907 адад коҳиш ёфтааст, ки ба гуфтаи масъулин аз беҳтар гардидани сатҳи риояи қонун гувоҳӣ медиҳад.

Ҳамзамон, дар ин давра аз ҷониби мақомоти дахлдор 26 ҳазору 71 рейд гузаронида шудааст. Аз ҷумла, дар шаҳри Душанбе 7 ҳазору 492, дар Вилояти Мухтори Кӯҳистони Бадахшон 200, дар вилояти Суғд 3 ҳазору 249, дар вилояти Хатлон 6 ҳазору 50 ва дар шаҳру ноҳияҳои тобеи ҷумҳурӣ 9 ҳазору 80 рейд анҷом ёфтааст.

Дар натиҷаи ин санҷишҳо нисбати 1 ҳазору 297 ҳолати ҳуқуқвайронкунии маъмурӣ парванда тартиб дода шуда, вобаста ба 1 ҳазору 268 ҳолат ҷазо таъин гардидааст. Ҳамчунин, 29 парванда ҳангоми баррасӣ аз ҷониби судҳо қатъ карда шудааст.

Раиси Кумитаи дин таъкид намуд, ки назорат аз болои иҷрои Қонуни Ҷумҳурии Тоҷикистон “Дар бораи танзими анъана ва ҷашну маросим” минбаъд низ тақвият ёфта, корҳои фаҳмондадиҳӣ миёни аҳолӣ ва шахсони мансабдор идома хоҳанд ёфт.

Яҳё МАҲМАДНАБИЕВ, “ҶТ”