Теъдоди донишҷӯён дар Донишгоҳи давлатии тиббии Тоҷикистон ба номи Абуалӣ ибни Сино нисбат ба соли таҳсили гузашта 3 фоиз афзуда, аз 12 631 ба 13 024 нафар расидааст.

Тавре ректори донишгоҳи мазкур Муҳриддин Нуриддин Давлаталӣ зимни нишасти матбуотӣ ба хабарнигорон иттилоъ дод, Донишгоҳ дар асоси Иҷозатнома оид ба пешбурди фаъолияти таълимӣ дар соҳаи таҳсилоти тиббии фармасевтӣ аз рӯи 5 ихтисос: “Кори табобатӣ”, “Педиатрия”, “Ташкили ҳифзи саломатии ҷомеа”, “ Стоматология” ва “ Фарматсия” мутахассис омода менамояд.

Бо назардошти талаботи соҳаи тандурустии кишвар, баланд бардоштани сатҳу сифати хизматрасонии озмоишҳои тиббӣ ва иҷтимоӣ 2 ихтисоси нав - “Биохимияи клиникӣ” ва “Психологияи тиббӣ” илова карда шудааст, ки қадами нав дар рушди ин соҳаи муҳим арзёбӣ гардид. Гуфта шуд, ки қабул ба ин ихтисосҳо аз соли нави таҳсили 2025-2026 ба роҳ монда мешавад.

Ҳамчунин қайд гардид, ки дар Донишгоҳ таъсиси боз як ихтисоси нав - “Тиббӣ-ҳарбӣ” дар назар дошта шудааст.

Айни ҳол дар Донишгоҳ аз рӯи 40 ихтисос омода намудани мутахассисони соҳаи тандурустӣ дар зинаи таҳсилоти баъдидипломӣ, аз ҷумла таҳсил дар зинаи интернатура, ординатураи клиникӣ, ихтисосгирии аввалия, магистратура, аспирантура, докторантура аз рӯи ихтисос (PhD) ва докторантура ба роҳ монда шудааст. Аз соли таҳсили нави 2024-2025 аз ҳамаи ихтисосҳо дар постдоктурантура тайёр кардани доктор ҳабилитат ба роҳ монда шудааст.

Дар Донишгоҳ барномаҳои кории ҳамаи ихтисосҳо ба стандартҳои байналмилалӣ мутобиқ карда шуда, усулҳои муосири таълимдиҳӣ, симуляторҳои муосири таълимӣ, технологияи иттилоотӣ - коммуникатсионӣ васеъ ба роҳ монда шудаанд ва платформаҳои рақамӣ барои омӯзиш ва идоракунии раванди таълим ҷорӣ карда шудаанд. Бо мақсади беҳтар кардани сифати таълими донишҷӯён ду кафедраи алоҳидаи рентгенология ва радиология ва забони лотинӣ ташкил карда шудааст.

Шаҳло ЭШОНОВА, “ҶТ”