Дар соли 2024 дар неругоҳҳо ва марказҳои истеҳсоли барқу гармии ҶСК “Барқи тоҷик” ҳаҷми истеҳсоли неруи барқ дар маҷмуъ 17 млрд 420 млн кВт. соатро ташкил дод, ки нисбат ба соли 2023 дар ҳаҷми 941,5 млн кВт. соат зиёд аст.

Ин нукта дар нишасти иатбуотии ҶСК “Барқи тоҷик” имрӯз - 11 феврал баён гардид.

Тавре роҳбари ниҳоди мазкур Асозода Маҳмадумар қайд намуд, истеҳсоли неруи барқ дар неругоҳҳои барқи обӣ дар ҳаҷми 15 млрд 760,9 млн кВт. соат ва дар марказҳои барқу гармидиҳӣ дар ҳаҷми 1 млрд 659,6 млн кВт. соат таъмин карда шудааст.

Гуфта шуд, ки дар ин давра бо мақсади беҳтар намудани таъминоти неруи барқ аз дигар истеҳсолкунандагони мустақили дохили ҷумҳурӣ ва хориҷи кишвар дар ҳаҷми 4 млрд 947,7 млн кВт. соат неруи барқ харидорӣ шудааст, ки дар муқоиса бо соли 2023 ҳаҷми хариди неруи барқ 207,0 млн кВт. соат кам мебошад. Неруи барқ асосан аз неругоҳҳои барқи обии “Сангтуда-1”, “Сангтуда-2” ва “Роғун” харидорӣ шудааст.

Ҳаҷми содироти неруи барқ ба хориҷи кишвар нисбат ба соли 2023 дар ҳаҷми 203,9 млн кВт. соат кам гардида, дар маҷмуъ ба 2 млрд 473,2 млн кВт. соат баробар шудааст. Неруи барқ дар мавсимҳои серобӣ (моҳҳои май-сентябр) асосан ба Афғонистон дар ҳаҷми 1 млрд 525,4 млн кВт. соат ва ба Ҷумҳурии Узбекистон дар ҳаҷми 943,9 млн кВт. соат интиқол дода шудааст.

Дар мавриди баланд шудани нархи истифодаи неруи барқ гуфта шуд, ки чунин пешниҳод ба Ҳукумати Ҷумҳурии Тоҷикистон ироа гардидааст ва он дар баррасии Ҳукумати кишвар қарор дорад.

Шаҳло ЭШОНОВА, “ҶТ”