Дар портали ягонаи хизматрасониҳои давлатӣ, https://ekhizmat.tj/ , ки соли гузашта дар асоси Фармони Президенти Ҷумҳурии Тоҷикистон бо мақсади таъмини шаффофият ва самаранокии пешниҳоди хизматрасониҳои давлатӣ ва рушди низоми ҳукумати электронӣ таъсис дода шуда буд, 83 номгӯи хизматрасонии давлатӣ дастрас шудааст.

Дар ин бора имрӯз - 6 феврал Хуршед Мирзо, директори Агентии инноватсия ва технологияҳои рақамии назди Президенти Ҷумҳурии иттилоъ дода гуфт, ки шаҳрвандон метавонанд аз ин номгӯи хизматрасониҳои давлатӣ дар портали мазкур бе ҳозиршавӣ ба мақомот истифода баранд.

- Аз ҷумлаи ин хизматрасониҳо ваколатнома оид ба идоракунии воситаи нақлиёт бе ҳуқуқи ихтиёрдорӣ, ваколатнома оид ба идоракунии воситаи нақлиёт бо ҳуқуқи ихтиёрдорӣ, маълумотнома дар бораи доштан ё надоштани доғи судӣ, иҷозат (талон) барои истифодабарии воситаи нақлиёт бо шишаҳои сиёҳу хира, баҳисобгирии тӯйҳои домодиву арӯсӣ, бақайдгирии соҳибкори инфиродӣ, гирифтани имзои электронӣ, иҷозат барои оғоз намудани корҳои сохтмонӣ, бақайдгирии давлатии таваллуд, додани хулоса барои гирифтани тамғаҳои аксизӣ ва пардохти андоз барои воситаи нақлиёт мебошанд"- гуфт Хуршед Мирзо.

Дар идома зикр гардид, ки бо ҷалби барномасозони ватанӣ, Низоми ягонаи гардиши ҳуҷҷатҳои электронӣ бо назардошти таҷрибаи кишварҳои минтақа таҳия карда шуда, дар беш аз 850 мақомоту ташкилоти давлатӣ ва зерсохтори онҳо ҷиҳати таъмини мубодилаи мукотибот бидуни истифодаи коғаз фаъол мебошад.

Инчунин, таъкид шуд, дар ин раванд, барои тасдиқи аслият ва амнияти мукотибот имзои электронии дар серверҳои дохилӣ сабтшуда барои зиёда аз 14 ҳазору 500 нафар истифодабаранда дастрас гардидааст.

- Хизматрасониҳои давлатӣ марҳила ба марҳила ба шакли рақамӣ табдил дода шуда, бо пайгирии феҳристи ягона тавассути портал пешниҳод мегарданд. Ин раванд дар доираи Солҳои рушди иқтисоди рақамӣ ва инноватсия бо фарогирии пурра таъмин карда мешавад,- илова кард директори Агентӣ.

Гулафшон КАРИМОВА, “ҶТ”