Намояндагони шаш корхонаи истеҳсолкунандаи маҳсулоти ҳунарҳои дастии ҷумҳурӣ дар як давраи омӯзишӣ, ки 15-17 сентябр дар шаҳри Бишкеки Қирғизистон доир мегардад, рангпардозии мувофиқ ба меъёрҳои қабулшудаи Иттиҳоди Аврупоро меомӯзанд.

Давраи омӯзиширо Маркази тиҷорати байналмилалӣ бо ҳадафи мусоидат ба истеҳсолкунандаҳои маҳсулоти дастӣ аз Тоҷикистон дар дарёфти роҳ ба бозорҳои аврупоӣ ва тақвияти рақобатпазирии маҳсулоташон баргузор мекунад. Ширкати маъруфи ҳунармандии қирғиз – “Тумар” ба лоиҳа ҷалб шуда, ин давраи омӯзишӣ доир ба рангпардозиро мегузаронад.

Давраи омӯзишӣ ҷузве аз омодагиҳо ҷиҳати иштирок дар намоишгоҳи байналмилалии “Ambiente” мебошад, ки соли оянда дар шаҳри Франкфурти Олмон баргузор мегардад. Ҳадаф аз он баррасии сабақҳои омӯхташуда аз иштирокҳои қаблӣ дар намоишгоҳи Франкфурт ва кор сари дарк ва офариниши рангҳои мавриди писанди аврупоиҳост.

Бар иловаи омӯзиши рангпардозӣ ва василаҳои гуногуни он, иштирокчиёни давраи омӯзишӣ  аз бозорҳо, фурӯшгоҳҳо, ва корхонаҳои шаҳри Бишкек дидан мекунанд. Дарси комили амалии рангпардозӣ низ ҷузви ҳатмии давраи омӯзишӣ мебошад.