21 феврал дар доираи нақша - чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон ҷиҳати сазовор истиқбол гирифтани 32 – умин солгарди таъсисёбии Қувваҳои Мусаллаҳ дар толори Кумита бо иштироки собиқадорони ҷангу меҳнат ва афсарону сарбозони Қувваҳои мусаллаҳи кишвар Ҳамоиши тантанавӣ таҳти унвони “Нақши Пешвои миллат дар ташаккул ва рушди Қувваҳои Мусаллаҳи Ҷумҳурии Тоҷикистон” доир гардид.

Дар кори ҳамоиш Зулфиқор Гулаҳмадзода, раиси Кумитаи кор бо ҷавонон ва варзиш, Файзулло Наҷмиддиниён, вакили Маҷлиси намояндагони Маҷлиси Олии Ҷумҳурии Тоҷикистон, Ҷило Гулназарзода, ректори Донишгоҳи байналмилалии забонҳои хориҷии Тоҷикистон ба номи Сотим Улуғзода, Умарҷони Эмомалӣ, муовини роҳбари Дастгоҳи Вазири корҳои дохилӣ полковники милитсия ва Ваҳобзода Абдураҳмон, муовини директори Муассисаи давлатии “Маркази исломшиносӣ дар назди Президенти Ҷумҳурии Тоҷикистон” иштирок ва суханронӣ намуданд.

Раиси Кумита зимни суханронии худ аз ғамхориҳои пайвастаи давлату Ҳукумати кишвар зери роҳбарии Сарфармондеҳи Олии Қувваҳои Мусаллаҳи Ҷумҳурии Тоҷикистон, Пешвои миллат муҳтарам Эмомалӣ Раҳмон ёдовар шуда, нақши Пешвои миллатро дар таҳким ва рушди Артиши миллӣ бесобиқа арзёбӣ кард. Ӯ аз ҷумла гуфт, ки айни замон Артиши миллӣ қодир аст амнияти давлату миллат ва ҳифзи марзу буми кишварамонро пурра таъмин намояд. Зеро, қудрату тавоноӣ ва омодагии комили Қувваҳои Мусаллаҳ дар ҳимоя, пешгирӣ ва мубориза бар зидди ҳама гуна хавфу хатар ва таҳдидҳо ҳам дар амал ва ҳам дар машқҳои низомӣ борҳо собит гаштааст.

Инчунин зимни ҳамоиш гуфта шуд, ки вазифаи ҳар як шаҳрванди ватандӯст афзун намудани дастовардҳои Истиқлолият ва таҳкими рукнҳои давлатдорӣ аст, ки яке аз ин рукнҳо Қувваҳои Мусаллаҳи Тоҷикистон мебошад.

Ҳамзамон таъкид намуданд, ки беҳтарин ифодаи шукргузорӣ аз соҳибватан будан ва расидан ба қадри истиқлоли миллӣ ва давлати соҳибихтиёр, ин ватандӯстӣ буда, равшантарин изҳори ватандўстӣ, хизмат кардан ба Ватан аст. Ватанро дӯст доштан, бо он ифтихор кардан, барои ҳимояи он омода будан, ба қадри сулҳу субот, осудагиву ваҳдат ва истиқлол расидан, шукронаи соҳибватаниву соҳибдавлатӣ кардан ва эҳтироми падару модарро ба ҷо овардан аз ҷумлаи арзишҳое маҳсуб меёбанд, ки ҷавонон бояд ин арзишҳоро дастури зиндагии ҳаррӯзаи худ қарор диҳанд.
Дар фарҷоми ҷорабинӣ ба чанд нафар собиқадорони ҷангу меҳнат ва афсарону сарбозон сипосномаи Кумита ва туҳфаҳои хотиравӣ тақдим гардид.