ИҚТИСОД
Якшанбе 26 Март 2017 06:24
410

Соли сипаришуда қисмати асосии фаъолияти Палатаи савдо ва саноати ҷумҳурӣ ба амалӣ гарданидани барномаҳо оид ба мусоидат ва дастгирии истеҳсолкунандагони ватанӣ дар созмон додани корхонаҳои инноватсионӣ, тайёр кардани мутахасисон ва баланд бардоштани савияи дониши онҳо дар самтҳои гуногуни иқтисод, баланд бардоштани иқтидори содиротӣ, ҳимояи манфиатҳои соҳибкорон дар хориҷи кишвар ва гузарондани чорабиниҳои намоишгоҳӣ равона гардид.

Тавре раиси Палатаи савдо ва саноати ҷумҳурӣ Шариф Саид дар нишасти матбуотӣ иброз дошт, соли 2015 бо ташаббуси палата зиёда аз 30 намоишгоҳ доир гардид. Чанд намоишгоҳ дар сатҳи вилоятҳо низ баргузор шуданд. Яке аз чунин чорабиниҳои муҳим баргузории аввалин намоишгоҳи байналмилалии «Молҳои истеҳсоли Покистон» мебошад. Дар он 25 ширкати Покистон маҳсулоти худро, аз ҷумла газвор, мебел, хӯрокворӣ, касметикаю атриёт, таҷҳизоти тиббӣ, пойафзоли чармӣ, масолеҳи сохтмонӣ ва технологияи иттилоотиро ба намоиш гузоштанд. Баргузории намоиш баёнгари рушди ровобити тиҷоратӣ ва иқтисодии Тоҷикистону Покистон мебошад.

- Намоишгоҳҳо, ки яке аз фишангҳои асосии фаъолгардонии робитаҳои берунаи иқтисодӣ ба шумор мераванд, ба мустаҳкамшавии иқтидори иқтисодӣ, ҷалби сармоягузориҳо ба мамлакат, ҷорӣ кардани истеҳсолоти технологияи баланд, рушди инноватсионӣ, ноил гардидан ба ҳадафҳои стратегии муассисаҳо, таъсиси ҷойҳои нави корӣ, дастгирӣ ва рушди соҳибкорӣ мусоидат мекунанд, - гуфт Шариф Саид. - Иштироки фаъоли Тоҷикистон дар гузаронидани намоишгоҳҳо ба рушди ҳамкории интегратсионӣ, мустаҳкамкунии кооператсияи илмӣ-истеҳсолӣ бо тамоми кишварҳои ҷаҳон нигаронида шудааст. Палата намоишгоҳҳоеро доир мекунад, ки ба муассисаҳои ватанӣ баҳри нишон додани маҳсулоти рақобатпазир кӯмак мерасонад.

Соли 2015 бо ташаббуси Палатаи савдо ва саноати ҷумҳурӣ зиёда аз 34 мизи мудаввар ва 46 семинару конфронс доир шуд. Дар ин муддат 1750 нафар соҳибкор ба намоишгоҳҳои байналмилалии хориҷӣ рафтанд. Бо мақсади муаррифии фаъолияти палата дар соманаи он 1411 маълумот ҷой дода шуд.

Бо ташаббуси палата соли гузашта соҳибкорони Чин таҳти роҳбарии сардори Департаменти тиҷорати ҳукумати мардумии музофоти Гансу Чин Жан Шиен аз минтиқаи озоди иқтисодии Данғара боздид ба амал оварданд.

Ин гуна чорабиниҳо имсол низ баргузор шуда, ба истеҳсолкунанадагони ватанию хориҷӣ бозорҳои нав кушода, боиси ҷалби сармоягузориҳо мешаванд.

Эзоҳи худро нависед



Рамзҳо дар расм