Палатаи ҳисоби Ҷумҳурии Тоҷикистон дар натиҷаи гузаронидани чорабиниҳои аудиторӣ дар вазорату, марказҳои татбиқи лоиҳаҳои сармоягузорӣ, бонку корхона ва дигар муассисаҳои буҷетӣ дар ҳаҷми 282,8 млн сомонӣ зиёни молиявиро ошкор намудааст.

Раиси Палатаи ҳисоб Қарахон Чилазода рӯзи 2 феврал зимни нишасти матбуотӣ бо хабарнигорон изҳор дошт, ки дар соли 2021 247 чорабиниҳои аудиторӣ-санҷишӣ гузаронида шудааст.
“Дар ин давраи Палатаи ҳисоб дар вазорату идораҳо, марказ ва гурӯҳҳои татбиқи лоиҳаҳои сармоягузорӣ, бонкҳо, субъектҳои хоҷагидорӣ ва дигар муассисаҳои буҷетӣ 247 чорабиниҳои аудиторӣ гузаронида, зарари молиявиро ба маблағи 282,8 млн. сомонӣ муайян намуд, ки нисбат ба соли қаблӣ шумораи объектҳои мавриди аудит қарордодашуда 25 адад кам ва зарари молиявии ошкоргардида ба маблағи 30, 5 млн сомонӣ зиёд аст”,- гуфт ӯ.

Ҳамзамон раиси Палата зикр кард, ки аз маблағи умумии зарари молиявии ошкоргардида, хароҷотҳои ғайриқонунии пулию молӣ 55,7 млн сомонӣ, камомад ва тасарруфи воситаҳои пулию молӣ, 8,9 млн сомонӣ изофанависӣ дар корҳои таъмиру сохтмонӣ 23, 4 млн сомонӣ, зарар аз фурӯш ва иҷораи амволи давлатӣ 1,2 млн сомонӣ, талафи воситаҳои пулию молӣ 89,7 млн сомонӣ, талафи буҷет аз ҳисоби маблағҳои кам ҳисобгардида ва рӯйпӯшнамудаи андозҳо 49,9 млн сомонӣ, пардохтҳои ҳатмӣ ва дигар пардохтҳо ба буҷети давлатӣ 45,4 млн сомонӣ ва пардохт накардани маблағи суди саҳмияҳои давлатӣ 8,6 млн, сомониро ташкил медиҳад.

Инчунин гуфта шуд, ки оиди бартараф намудани камбудию норасоиҳои ошкоргардида чораҳои мушаххас андешида шуда, зарари молиявӣ ба маблағи 274,5 млн сомонӣ, аз ҷумла ба буҷет 108,4 млн сомонӣ, ба корхонаҳо 136,6 млн сомонӣ ва тавассути мақомоти ҳифзи ҳуқуқ 29,5 млн сомонӣ барқарор карда шуд.