Суди Олӣ дар соли 2025 аз ҳисоби боҷи давлатӣ, ҷарима, мусодираи молу мулк, зарари ба давлат расонидашуда ба фоидаи давлат маблағи умумии 216 млн 395 ҳазору 177 сомонӣ рӯёнид, ки нисбат ба ҳамин давраи соли гузашта 90 млн 789 ҳазору 113 сомонӣ зиёд мебошад.

Дар ин хусус, имрӯз - 12 феврал Рустам Мирзозода, раиси Суди Олӣ хабар дода, ҳамзамон афзуд, ки дар ин давра вобаста ба риоя накардани Қонуни Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон” 1297 адад парвандаи ҳуқуқвайронкунии маъмурӣ баррасӣ шуда, аз онҳо ба 1268 шахс ба маблағи умумии 10 млн 989 ҳазору 681сомонӣ ҷарима татбиқ карда шудааст.

Ҳамчунин, гуфта шуд, ки дар давраи ҳисоботӣ шумораи баррасии парвандаҳои ҳуқуқвайронкунии маъмурӣ ҷиҳати риоя накардани Қонуни Ҷумҳурии Тоҷикистон “Дар бораи масъулият барои таълиму тарбияи кӯдак” ба 10 ҳазору 536 адад расида, аз ин шумора нисбати 8 ҳазору 561 шахс ҷарима ба маблағи умумии 6 млн 957 ҳазору 634 сомонӣ таъин карда шудааст.

Зимнан, иттилоъ дода шуд, ки соли 2025 аз ҷониби судҳо дар марҳилаҳои якум, кассатсионӣ ва назоратӣ дар маҷмуъ 153 ҳазору 150 адад парвандаҳои маданӣ, оилавӣ, ҷиноятӣ, маъмурӣ, дархостҳои мақомоти тафтиши пешакӣ, пешниҳодҳои муассисаҳои ислоҳӣ ва иҷрочиёни Хадамоти иҷро баррасӣ карда шуданд, ки ин шумора нисбат ба ҳамин давраи соли гузашта 16 ҳазору 464 адад кам мебошад.

Гулафшон КАРИМОВА, "ҶТ"