Вазорати меҳнат, муҳоҷират ва шуғли аҳолии Ҷумҳурии Тоҷикистон дар шаш моҳи гузашта 41 ҳазору 205 нафарро бо ҷойи кор таъмин кардааст.

Дар ин бора имрӯз - 30 июл дар нишасти хабарии Вазорат маълумот доданд.

Холмаҳмадзода Солеҳа, вазири меҳнат, муҳоҷират ва шуғли аҳолӣ иброз дошт, ки дар нимсолаи якуми соли ҷорӣ ба мақомоти меҳнат ва шуғли аҳолӣ 79 ҳазору 870 нафар шаҳрванд муроҷиат намудаанд, ки аз ин миқдор ба 33 ҳазору 802 нафар расман мақоми бекорӣ дода шуда, 41 ҳазору 205 нафар шаҳрванди бекор ва мухоҷирони меҳнатӣ бо ҷойҳои кории доимӣ, муваққатӣ ва мавсимӣ таъмин гардиданд. Ба қавли вазир ин шумора нисбат ба ҳамин давраи соли гузашта 305 нафар ё 0,7 фоиз зиёд мебошад.

Таъкид гардид, ки тавассути ҷойҳои кории бандшуда (квотаҳо) 4640 нафар, корҳои фардӣ 1199 нафар, тариқи ҷалб ба корҳои ҷамъиятии музднок 3478 нафар бо кор таъмин гардиданд.

Инчунин, дар ин давра тибқи роҳхатҳои мақомоти меҳнат ва шуғли аҳолӣ 9 ҳазору 179 нафар дар марказҳои таълимӣ ба омӯзиш фаро гирифта шуда, ба 9 ҳазору 550 нафар кӯмакпулӣ барои давраи бекорӣ таъин ва пардохт гардид.

Гулафшон КАРИМОВА,“ҶТ”