Коргардон Одина Маҳмад филми мустанади наверо таҳти ин унвон “Заволи пиряхҳо” таҳия кардааст, ки ба мавзӯи муҳим ва мубрами тағирёбии иқлим бахшида шудааст.

Филми мазкур ба вазъи пиряхҳои Тоҷикистон, ки яке аз манбаъҳои муҳими оби тоза барои минтақа мебошанд, равшанӣ меандозад.

Ин филми мустанад дар асоси тадқиқоти олимони соҳа, ки дар тули 20 соли охир натиҷагирӣ шудаанд, бахшида шуда, чигуна гармшавӣ ва тағирёбии иқлимро, ки боиси обшавии босуръати пиряхҳои Тоҷикистон шудааст, ба риштаи таҳлил мекашад.

Тавре коргардони филм дар суҳбат бо мо гуфт: “Дар филм графикаи 3D ва инфографика истифода шудаанд, ки ин ба тамошобинон имкон медиҳад, то пайомадҳои экологиро аз ҷумла тағирёбии иқлимро равшантар дарк кунад”.

Ёдовар бояд шуд, ки филми мазкур муддати 7 моҳ омода шуда, муаллиф Некрӯзи Ҷалилиён ва наворбардор Абдукарим Уроқов мебошад. Ҳамчунин барои омода кардани филм ниҳодҳои давлатӣ - Кумтаи ҳифзи муҳити зисти назди Ҳукумати Ҷумҳурии Тоҷикистон, Агентии обуҳавошиносӣ ва Маркази пиряшиносии Академияи миллии илмҳои Тоҷикистон мусоидат кардаанд.