Соли 2024 Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати Ҷумҳурии Тоҷикистон 340 нафар шахсони ҳуқуқӣ ва воқеии корхонаҳои бақайдгирифташударо ба ҷавобгарии маъмурӣ кашида, ба маблағи умумии 1 613 536 сомонӣ ҷарима кардааст.

Дар ин бора Раҳим Санъат Асо, сардори хадамоти мазкур 28-уми январ зимни нишасти матбуотӣ иттилоъ дод.

Номбурда ҳамчунин, дар идома қайд кард, ки дар корхонаву объектҳои зериназоратии Хадамот соли гузашта 48 ҳодисаи нохуш ба қайд гирифта шудааст, ки нисбат ба соли 2023 4 адад камтар мебошад. Аз ҳодисаҳои баамаломада 30 нафар ҳалок ва 26 нафар ҷароҳатҳои ҷисмонӣ бардоштаанд.

- Барои роҳ додан ба қоидавайронкуниҳо нисбати 7 шахси ҳуқуқӣ, 27 шахси мансабдор ва 5 шахси воқеӣ аз тарафи комиссияҳои тафтишотӣ ҷазои маъмурӣ татбиқ гардида, ба андозаи 182 080,0 сомонӣ ҷаримабандӣ карда шуданд. Ҳамчунин, ба 56 нафар зарардида (аз ҷумла ба 30 нафар фавтида) аз тарафи корхонаҳо, иттифоқҳои касаба ва шахсони воқеӣ кумакпулӣ дар ҳаҷмӣ 8 862 156,0 сомонӣ расонида шудааст, - зикр кард ӯ.

Ҳошим РАҲМАТУЛЛОЕВ, “ҶТ”