Имрӯз - 06 декабр Қобилҷон Хушвахтзода, президенти Академияи миллии илмҳои Тоҷикистон, узви вобастаи АМИТ дар ҳошияи сафари корӣ ба кишвари Ҷопон аз Донишгоҳи Васэдаи Ҷопон дидан намуд.

Дар ин хусус телеграмканали Академияи миллии илмҳо иттиллоъ дода, менависад, ки дар доираи ин сафар Қобилҷон Хушвахтзода бо декани факултети инжинерии донишгоҳ Йонеда ва профессор Ямамото Томоюки мулоқот намуд.

Гуфта мешавад, ки ҳамкории илмии Тоҷикистону Ҷопон фаъолона рушд намуда, соҳаҳои гуногун, аз ҷумла маориф, технология, кишоварзӣ, экология ва таҳқиқоти тиббиро фаро мегирад.

Ҳамчунин таъкид мегардад, ки барои рушди муносибатҳои ҳамкорӣ аз ин ба баъд имкониятҳои лозима фароҳам оварда шуда, дар оянда байни олимони Донишгоҳи Васэда ва олимони Институти забон ва адабиёти ба номи А.Рӯдакӣ, инчунин Институти омӯзиши масъалаҳои давлатҳои Осиё ва Аврупои Академияи миллии илмҳои Тоҷикистон вусъат хоҳанд ёфт, то таҳқиқотҳои муштарак байни ин кишварҳо гузаронида шавад.