Соли 2020 Донишгоҳи давлатии тиҷорати Тоҷикистонро 682 нафар хатм намуданд, ки аз онҳо 7 нафар донишҷӯи зинаи бакалавриат ва 7 нафар донишҷӯи зинаи магистратура донишгоҳро бо дипломи аъло хатм карданд.

Ин нуктаро Ҳамитов Муҳитдин Сайдалиевич, иҷрокунандаи вазифаи муовини ректори Донишгоҳи давлатии тиҷорати кишвар оид ба таълиму тарбия, 17 июл зимни нишасти хабарӣ баён намуда, ӯ дар посух ба саволи рӯзноманигори “Ҷавонони Тоҷикистон” оид ба он ки “Шумораи нафароне, ки дипломи аъло гирифтаанд, нисбати шумораи умумии хатмкунандагони донишгоҳ дар соли ҷорӣ оё кам нест?” гуфт:

- Албатта, агар ба ин шумора бо фоиз нигарем, хеле кам аст. Аммо нисбати соли гузашта, дипломи аъло панҷ адад зиёд аст. Дар низоми кредитӣ ҳамин хел аст, ки дипломи аъло гирифтан, бисёр мушкил аст. Барои ин чиз донишҷӯ бояд дар давоми чор сол бисёр меҳнат намоянд. Агар дар ин раванд каме агар саҳлангорӣ кунад, холашон паст мешавад ва гирифтани дипломи аъло мушкил мегардад.

Дар идома вобаста ба фаъолияти эҳсонкорӣ ва ҳавасмандгардонӣ дар Донишгоҳи давлатии тиҷорати кишвар гуфта шуд, ки ба донишҷӯёни ятими кул, нимятим ва камбизоат ба миқдори 3220 сомонӣ кумаки моддӣ расонида шуд.