Дар нишасти матбуотии Донишкадаи инноватсионии Душанбе роҳбарияти муассиса оид ба марҳилаҳои таъсис, имкониятҳои таълимӣ ва дурнамои рушди донишкада ба намояндагони воситаҳои ахбори омма иттилоъ доданд.

Дар рафти нишаст Абдуфаттоҳ Шарифзода, муовини аввали ректор иттилоъ дод, ки Донишкадаи инноватсионии Душанбе яке аз муассисаҳои навтаъсиси таҳсилоти олии касбӣ дар кишвар буда, бо як қатор хусусиятҳои фарқкунанда фаъолият менамояд. Аз ҷумла, ин аввалин мактаби олии Тоҷикистон маҳсуб меёбад, ки раванди таҳсил пурра ба забони англисӣ ба роҳ монда шуда, ҳамзамон омӯзгорони соҳибтаҷриба ва мутахассисони баландихтисос аз хориҷи кишвар ҷалб гардидаанд.

Зикр шуд, ки Донишкада ҷиҳати омода намудани мутахассисони рақобатпазири соҳаҳои гуногун бо бинои нави таълимӣ, ҳайати омӯзгорону профессорон, лабораторияҳои муосир, китобхона, ошхона ва дигар шароити зарурӣ таъмин мебошад.

Ба иттилои масъулин, дар асоси фармоиши директори Агентии назорат дар соҳаи маориф ва илми назди Президенти Ҷумҳурии Тоҷикистон аз 7 июли соли 2023, №479 ба Донишкада барои пешбурди фаъолияти таълимӣ аз рӯйи як қатор ихтисосҳои ҳамгиро дар зинаи бакалавр иҷозатнома дода шудааст. Минбаъд, бо фармоиши директори Агентӣ аз 25 июни соли 2024 ба муассиса барои омода намудани мутахассисон аз рӯйи ихтисосҳои биология (биотехнология), информатика ва информатикаи физикавӣ иҷозат дода шуда, барои таҳсили рӯзона 150 ҷой, таҳсили фосилавӣ 75 ҷой, магистратураи рӯзона 60 ҷой ва ҳамчунин 150 ҷой барои шаҳрвандони хориҷӣ ҷудо гардидааст.

Ҳамчунин, иттилоъ дода шуд, ки бо фармоиши директори Агентии назорат дар соҳаи маориф ва илм аз 11 декабри соли 2025 ба Донишкадаи инноватсионии Душанбе иҷозатномаи фаъолияти таълимӣ барои муҳлати номаҳдуд дода шуда, Донишкада аз рӯйи 11 ихтисос дар зинаи бакалавр ва 3 ихтисос дар зинаи магистратура, аз ҷумла ихтисосҳои нав дар самти иқтисодиёти таҳлилӣ, иқтисодиёти рақамӣ, бизнес ва зеҳни сунъӣ, фаъолияти таълимӣ мебарад. Таҳсил аз рӯйи аксари ин ихтисосҳо бо забони англисӣ ба роҳ монда шудааст.

Гуфта шуд, ки сохтори Донишкада тибқи қарори Шурои олимон аз 28 августи соли 2024 тасдиқ гардида, як факултет, ду кафедра ва як қатор шуъбаву марказҳои соҳавиро дар бар мегирад, ки фаъолияти мунтазам доранд.

Дар идома таъкид гардид, ки айни замон дар Донишкада 23 нафар омӯзгор фаъолият мекунанд, аз ҷумла 2 нафар доктори илм, профессор, 4 нафар номзади илм, 1 нафар докторанти PhD ва 12 нафар омӯзгорони ассистент, ки дар пешбурди фаъолияти таълимӣ, илмӣ ва тарбиявӣ саҳм мегузоранд.

Ба иттилои роҳбарият, Донишкада дар бинои муосир бо масоҳати умумии 2400 метри мураббаъ ҷойгир буда, дорои 36 синфхонаи таълимӣ, кабинетҳои фаннӣ, озмоишгоҳҳои таълимӣ ва илмӣ, синфхонаҳои компютерӣ, китобхона ва китобхонаи электронӣ, толори варзишӣ, ҳавзи шиноварӣ, ошхона, бунгоҳи тиббӣ ва дигар иншооти ёрирасон мебошад.

Иброз гардид, ки ҳоло дар се гурӯҳи академии факултети фанҳои дақиқ ва риёзӣ 58 нафар донишҷӯ таҳсил менамоянд, ки аз онҳо 11 нафар шаҳрвандони хориҷӣ аз кишварҳои Танзания, Покистон ва Индонезия мебошанд. Роҳбарияти Донишкада рушди ҳамкориҳои байналмилалӣ ва ҷалби донишҷӯёни хориҷиро яке аз самтҳои афзалиятноки фаъолияти худ арзёбӣ намуд.

Яҳё МАҲМАДНАБИЕВ, “ҶТ”