Дар Донишкадаи давлатии фарҳанг ва санъати Тоҷикистон ба номи Мирзо Турсунзода вобаста ба талабот ва ниёзҳои ҷомеа 7 ихтисоси нав ташкил карда шудааст.

Дар ин бора Муҳриддин Низомӣ, ректори Донишкада имрӯз - 7 феврал зимни нишасти матбуотӣ иттилоъ дод.

Номбурда ҳамчунин қайд кард, ки тибқи тақсимоти Маркази миллии тестии назди Президенти Ҷумҳурии Тоҷикистон дар се давра 537 нафар ба Донишкада қабул шуд, ки нақшаи қабул 57,5% иҷро гардид. Гарчанде ин нишондиҳанда чандон қонеъкунанда нест аммо нисбат ба солҳои гузашта хеле беҳтар аст.

- Дар солҳои қаблӣ иҷроиши нақшаи мазкур аз 37 то 40 фоиз иҷро мешуд. Иҷроиши 57,5 фоизи он дар соли ҷорӣ гарчанде кам ҳам бошад, аммо бо назардошти натоиҷи қаблӣ ин натиҷаи назаррас барои Донишкада ба ҳисоб меравад, - гуфт Муҳриддин Низомӣ.

Ба иттилои ректори Донишкада сабаби асосии зиёд шудани талаботи донишҷӯён барои таҳсил дар Донишкадаи давлатии фарҳанг ва санъат ба ташкили 7 ихтисоси нав рабт дорад.

Ҳошим РАҲМАТУЛЛОЕВ, "ҶТ"