Хонандагони синфи якум 1 август дар ҷумҳурӣ ба мактаб рафтанд.

Онҳо барои мутобиқшавӣ ба шароити мактаб ба муҳлати 15 ва дар баъзе мактабҳо ба муҳлати 20 рӯз паси мизҳои дарсӣ нишастанро оғоз карданд. Гуфта мешавад, ки Вазорати маориф ва илм ин тасмимро ба он хотир гирифтааст, ки кӯдакон ба шароити мактаб мутобиқ шуда, тарзи роҳгардӣ, омӯзиш, одобу рафтор, тарзи доштани ручка, шиносоӣ бо муаллимон ва ҳампартагон ва роҳҳои бехтариро омӯзанд.

Ҳусейн Махмедов, мудири шуъбаи кадрҳои Раёсати маориф ва илми шаҳри Душанбе иттилоъ дод, ки даъвати кӯдакон ба мактаб маҷбурӣ нест. “Ин тасмим дар ҳамаи макотиби кишвар ба роҳ монда шудааст. Аммо он ба таври маҷбурӣ нест. Аз ҳамин хотир дар баъзе мактабҳо 15 ва дар баъзе мактабҳо муҳлати он 20 рӯз муайян гардидааст. 15 август машғулиятҳо анҷом меёбанд”.

Ин тасмим дар ҳолест ки хонандаҳое, ки имсол ба синфи якум мераванд, як сол барои ба мактаб рафтан омодагӣ дида буданд.