Дар Донишгоҳи байналмилалии забонҳои хориҷии Тоҷикистон бо назардошти афзудани теъдоди тахассусҳо, кафедраҳо ва донишҷӯён 3 факултети нав: тарҷумонии забони англисӣ, равияи омӯзгории забонҳои Шарқ ва муносибатҳои байналмилалӣ таъсис ёфт.

Ин нуктаро Жило Гулназарзода, ректори донишгоҳи мазкур, имрӯз - 6 феврал зимни нишасти матбуотӣ баён намуд.

Ӯ гуфт, ки бо мақсади ба стандартҳои байналмилалӣ мутобиқ намудани ихтисосҳои мавҷуда раёсати Донишгоҳ 9 ихтисосро барои гузаронидан аз аккредитатсияи байналмилалӣ пешниҳод намуд ва коршиносони расмии Муассисаи Агентии мустақили аккредитатсия ва раддабандӣ сертификатҳои гузаштан аз аккредитатсияро ба роҳбарияти Донишгоҳ супориданд.

Барои тавсеа бахшидани фаъолияти Донишгоҳ ва ҷалби бештари довталабон боз 13 ихтисоси нави ба талаботи бозори меҳнат ҷавобгӯй дар зинаҳои бакалавриат ва магистратура таъсис дода шуд, ки аз соли таҳсили 2025-2026 қабули хоҳишмандон ба ин ихтисосҳо қабул карда мешаванд.

Дар соли 2024 дар Донишгоҳ 316 нафар тариқи буҷетӣ ва 1244 нафар тариқи шартномавӣ, ки дар маҷмуъ 1560 нафарро ташкил медиҳад, ба курси якум қабул карда шуданд, ки нисбат ба соли пешин 10 фоиз зиёд мебошад.

Шаҳло ЭШОНОВА, "ҶТ"