Имрӯз – 11 феврал Амри Президенти Ҷумҳурии Тоҷикистон дар бораи мукофотонидани ғолибон ва ҷоизадорони мусобиқаҳои байналмилалии варзишӣ ва мураббиёни онҳо ба тасвиб расид. Дар ин бора Хадамаоти матбуоти Президенти кишвар хабар дод.

Ба иттилои манбаъ, тибқи ин амр 67 варзишгаре, ки дар мусобиқаҳои байналмилалии варзишӣ ширкат карда, нишондодҳои беҳтаринро соҳиб шудааст, ҳамчунин, мураббиёни онҳо бо мукофотпулиҳо қадрдонӣ карда хоҳанд шуд.

Гуфта мешавад, ки маблағи ба ғолибон ва ҷоизадорони мусобиқаҳои байналмилалии варзишӣ тақдимшаванда 2 040 000 (ду миллиону чил ҳазор) сомонӣ буда, аз ҳисоби маблағҳои фонди захиравии Президенти Ҷумҳурии Тоҷикистон дар соли 2026 пардохт хоҳад шуд. Маблағи ҷоизаҳо барои як варзишар вобаста ба натиҷаи варзишӣ то 150 ҳазор сомонӣ пешбинӣ гардидааст.

Тибқи амри мазкур ва дар асоси пешниҳоди қарори Комиссияи мукофотпулиҳои Ҷоизаи Президенти Ҷумҳурии Тоҷикистон варзишгарон аз рӯйи 8 намуди варзиш, аз ҷумла гӯштини ҷудо, гӯштини тарзи озод, гӯштини юнонӣ-румӣ, бокс, қаиқронӣ, таэквандо (ВТ), самбо ва кикбоксинг бо Ҷоизаи Президенти Ҷумҳурии Тоҷикистон сарфароз гардонда мешаванд.

Бояд гуфт, ки таъсиси Ҷоизаи Президенти Ҷумҳурии Тоҷикистон ба ғолибон ва ҷоизадорони мусобиқаҳои байналмилалии варзишӣ нишонаи қадршиносии давлатии варзишгарони бонангу номуси кишвар, ки дар арсаи ҷаҳонӣ барои ҳифзи обрӯи миллат ва баланд бардоштани мақоми давлат заҳмат мекашанд, мебошад.

Ҷоизаи мазкур соли панҷум аст, ки зери сарпарастии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба ғолибон, ҷоизадорони мусобиқаҳои байналмилалии варзишӣ ва муррабиёни онҳо тақдим мегардад.