Кумитаи кор бо ҷавонон ва варзиши назди Ҳукумати кишвар дар якҷоягӣ бо Иттиҳодияҳои созмонҳои кор бо ҷавони Тоҷикистон имрӯз, 29 август дар Китобхонаи миллии Тоҷикистон Анҷумани VIII-уми ҷумҳуриявии Ташкилотҳои кор бо ҷавони Тоҷикистонро бахшида ба “Соли ҷавонон” доир намуд.

Дар баргузории анҷумани мазкур раиси Кумитаи кор бо ҷавонон ва варзиш Аҳтам Абдуллозода, вакили Маҷлиси намояндагон Қиёмиддин Миралиён, намояндаи ЮНИСЕФ дар Тоҷикистон Парвиз Бобоев, намояндаи Хазинаи кӯдакон ва нуфӯси СММ Хушбахт Ҳоҷиев, наздик ба 100 намояндаи ташкилотҳои ҷамъиятии кор бо ҷавонон, намояндагони ВАО ва волонтиёрон иштирок намуданд.

Анҷуманро раиси Кумитаи кор бо ҷавонон ва варзиш Аҳтам Абдуллозода ифтитоҳ намуда иброз дошт: “Боиси ифтихору шукургузорист, ки дар заминаи дастгириҳои пайваста ва ғамхорию таваҷҷуҳи доимии Асосгузори сулҳу Ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон тамоми тадбирҳои амалӣ ва судманд вобаста ба татбиқи дурусту самарноки сиёсати давлатии ҷавонон, нақш ва иштироки ҷавонон дар тамоми соҳаҳои ҳаёти давлатӣ дар замони соҳибистиқлолии кишвар роҳандозӣ гардида истодааст”.

Дар равоми суханронии худ раиси Кумита баргузории Анҷумани VIII-уми ҷумҳуриявии ташкилотҳои кор бо ҷавонони Тоҷикистонро идомаи ташббусҳо ва иқдомҳои созанда оид ба устуворӣ ва рушди ҷараёни идораи демократии ҷомеа хонда, онро мусоидаткунандаи рушди имконоти ҷомеаи шаҳрвандӣ муаррифӣ намуд. “Ҳамасола баргузор намудани Анҷуман ба ҳукми анъана даромадааст. Он майдоне мебошад, ки дар он ташкилотҳои кор бо ҷавонон, аз ҷумла ташкилотҳои ҷамъиятӣ имконияти табодули таҷриба, муайян кардани роҳу усулҳои ҳалли мушкилоти мавҷуда дар байни ҷавонон ва ташаккули муносибатҳои ҳамкориро тақвият мебахшад. Ҳадафи асосии баргузории чорабинӣ ин мусоидат барои иштироки ҷавонон, роҳбарони ташкилотҳои ҷавонон ва кор бо ҷавонон дар раванди қабули қарорҳои ба рушти устувори ҷамъият ва давлат нигаронида мебошад,- афзуд Аҳтам Абдуллозода.

Дар рафти чорабинӣ дигар роҳбарон ва иштирокчиён суҳбату мулоҳизаронӣ намуданд.

Ҳамчунин, дар рафти Анҷуман намояндагони ташкилотҳои ҷамъиятии кор бо ҷавонон, ки дар самти кор бо ҷавонон фаъолият доранд, доир ба пешрафт, мушкилот ва дигар масъалаҳои марбути ташкилотҳои кор бо ҷавонони Тоҷикистон ва самтҳои татбиқи дурусту самараноки сиёсати давлатии ҷавонон маърӯза намуданд.

Дар охир иштирокчиён вобаста ба ҳалли мушкилиҳои ҷойдошта дархосту пешниҳодҳои худро ироа намуданд.

Хуршед МАВЛОН, “ҶТ”