Рӯзҳои 26-28 ноябр дар шаҳри Душанбе Форуми иқтисодии навбатии СПЕКА-2024 (Барномаи махсуси иқтисодии СММ барои кишварҳои Осиёи Марказӣ ва Озарбойҷон) дар мавзуи “Рушди сабз дар минтақаи СПЕКА” баргузор мегардад.

Дар ин бора АМИТ “Ховар” бо истинод ба Вазорати рушди иқтисод ва савдои ҷумҳурӣ хабар додааст.

Ба иттилои мабаъ Форуми иқтисодии СПЕКА-2024 бо пешниҳоди Президенти Ҷумҳурии Тоҷикистон муҳтарам Эмомалӣ Раҳмон, ки дар ҷаласаи СПЕКА соли 2023 дар шаҳри Бокуи Ҷумҳурии Озарбойҷон ироа карда буданд, баргузор хоҳад шуд.

Ин чорабинии сатҳи баланд нақши калидии Тоҷикистонро ҳамчун ташаббускори рушди минтақавӣ нишон дода, дар масъалаҳои ҳифзи муҳити зист, рушди “сабз” ва ҳамкории минтақавӣ аҳамияти махсус дорад.

Гуфта мешавад, ки дар кори форум зиёда аз 100 намояндаи кишварҳои аъзои Барномаи махсуси иқтисодии СММ барои кишварҳои Осиёи Марказӣ ва Озарбойҷон ва ташкилоти бонуфузи байналмилалӣ иштирок намуда, дар самтҳои калидии рушди минтақавӣ ва ҳамкории муштарак мубоҳиса мекунанд.

Ёдовар мешавем, ки СПЕКА соли 1998 бо ташаббуси СММ таъсис ёфтааст. Ҳадафи асосии он мусоидат ба рушди иқтисодӣ ва таҳкими ҳамкории минтақавӣ мебошад. Давоми солҳои фаъолият Барномаи махсуси иқтисодии СММ барои кишварҳои Осиёи Марказӣ ва Озарбойҷон ба масъалаҳои муҳим, ба мисли савдои устувор, рақамикунонӣ, обу энергетика ва нақлиёт диққати махсус медиҳад.