Дирӯз зимни имзои санадҳои нави ҳамкорӣ, ки бо иштироки сарони давлатҳои Тоҷикистону Қазоқистон баргузор шуд, барои ҳамкорӣ дар соҳаи тарбияи ҷисмонӣ ва варзиш миёни Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Вазорати сайёҳӣ ва варзиши Ҷумҳурии Қазоқистон барномаи нави ҳамкорӣ ба имзо расид.

Дар ин бора хадамоти матбуоти Президенти кишвар хабар дод.

Ба иттилои манбаъ дар ин маросим миёни Тоҷикистон ва Қазоқистон 16 санади нави ҳамкорӣ ба имзо расид.

Яке аз санадҳои муҳимтарини он “Аҳднома дар бораи муносибатҳои ҳампаймонӣ миёни Ҷумҳурии Тоҷикистон ва Ҷумҳурии Қазоқистон” мебошад, ки онро Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Қазоқистон Қосим-Жомарт Токаев имзо карданд.

Ҳамчунин як санади дигаре, ки барои ҷавонони ҳарду кишвар муҳим арзёбӣ мегардад, Ёддошти ҳамкорӣ миёни Иттифоқи ҷавонони Тоҷикистон ва Маҷмааи ҷавонони Қазоқистон дониста мешавад.