СИЁСАТ
Ҷумъа 04 Декабр 2020 06:34
7259

Бо мақсади дуруст ба роҳ мондани корҳои фаҳмондадиҳӣ ва ташкилу баргузор намудани интихоботи Президенти Ҷумҳурии Тоҷикистон дар шаҳру ноҳияҳои Вилояти Мухтори Кӯҳистони Бадахшон коршиносони Комиссияи марказии интихобот ва раъйпурсии кишвар (КМИР) Ҷамшедзода Ҷамшед ва Насим Саидраҳмон барои раисони ҳавзаҳову участкаҳои интихоботӣ семинар – машварат гузарониданд.

Семинар дар ноҳияҳои Роштқалъа, Мурғоб, Ишкошим ва шаҳри Хоруғ гузашта, ба иштирокдорон тарзи омода намудани участкаҳои интихоботӣ ба интихоботи навбативу дигар мавзӯъҳои марбут фаҳмонда дода шуд.

Ҷамшедзода Ҷамшед оид ба талабот ва муқаррароти Қонуни конститутсионии Ҷумҳурии Тоҷикистон "Дар бораи интихоботи Президенти Ҷумҳурии Тоҷикистон ", ки аз ҷониби Комиссияи марказии интихобот ва раъйпурсии Ҷумҳурии Тоҷикистон дар таҳрири нав таҳия гардидааст, муаррифномаро дар шакли электронӣ (слайд) пешкаши иштирокдорон намуд.

Аз роҳбарияти шаҳру ноҳияҳо, комиссияҳои ҳавзавӣ ва раисони участкаҳои интихоботӣ даъват ба амал оварда шуд, ки кори худро дар асоси нақшаи тақвимии КМИР ба роҳ монанд.

Пешвои миллат муҳтарам Эмомалӣ Раҳмон дар Паёми навбатии худ ба Маҷлиси Олӣ низ қайд намуданд, ки мувофиқи меъёрҳои Конститутсия халқ баёнгари соҳибихтиёрӣ ва сарчашмаи ягонаи ҳокимияти давлатӣ мебошад ва онро бевосита ё ба воситаи вакилони худ амалӣ менамояд.

Интихобот ифодаи олии бевоситаи ҳокимияти халқ тавассути изҳори озодона ва ихтиёрии иродаи интихобкунандагон буда, ба таври демократӣ ва озоду шаффоф баргузор намудани он яке аз вазифаҳои муҳимми давлат мебошад.


Эзоҳи худро нависед



Рамзҳо дар расм