22 майи соли ҷорӣ дар кишвар раъйпурсии умумихалқӣ оид ба ворид намудани тағйиру иловаҳо ба Конститутсия баргузор мегардад.

Чун дигар шаҳру навоҳӣ масъулини шаҳри Кӯлоб низ ба ин маъракаи муҳим омодагии ҳамаҷониба дида истодаанд. Дар шаҳру деҳоти Кӯлоб барои омода намудани котибон ва раисони участакаҳои раъйпурсӣ 600 нафар аз курсҳо ва семинарҳои махсуси омӯзишӣ гузашта, пурра ба ин маъракаи муҳим омода шуданд.

Файзулло Абдуллоев, котиби комиссияи Ҳавзаи райъпурсии Кӯлоб №45 иттилоъ дод, ки дар Кӯлоб 98 ҳазору 830 нафар овоздиҳанда ба қайд гирифта шудаанд. Дар 57 участакаи раъйпурсӣ, ки дар шаҳр ташкил карда шудааст, тамоми шароит ва имконоти овоздиҳӣ муҳайё буда, пурра ба райъпурсии умумихалқӣ омодаанд. Хабарномаҳо аллакай ба дасти овоздиҳандагон расонида шуданд.

Баргузории як қатор чорабинӣ ва роҳпаймоиҳо аз ҷониби ҷавонон гувоҳи он аст, ки онҳо ба хубӣ манфиату зарурати ин райъпурсиро дарк карда, кӯшиш мекунанд чун ояндасозони давлату миллат дар ин маъракаи муҳим фаъолона ширката намоянд.

Фарзона ИСМОИЛОВА, "ҶТ"