Раиси ҳайати Қирғизистон, ҷонишини раиси дастгоҳи президенти ин кишвар Мира Карибоева нишасти САҲА-ро дар вақти баромади Кодиржон Ботиров, як мухолифи ҳукумати ин кишвар тарк кард.

Хонум Карибоева дар нишасти “Таҳаммулпазирӣ ва табъиз», ки 26 сентябр дар Варашава мегузашт, иштирок дошт. Ӯ дар баромади худ аз он изҳори нигаронӣ кард, ки САҲА ба Кодиржон Ботиров, ки барои содир кардани ҷиноятҳои вазнин, аз ҷумла, барангехтани адовати қавмӣ гунаҳкор дониста шуда, ҳукм гирифтааст, минбар дод. Карибаева гуфт, ин далелро мо ҳамчун беэҳтиромӣ нисбат ба Қирғизистон ва ҷабрдидагони амалҳои ӯ медонем.

Бояд гуфт, ки 20 октябр Кодиржон Ботиров дар Варшава муқобили қабули тағйирот ба Конститутсияи Қирғизистон баромад кард. Ӯ ғоибан ҷинояткор дониста шуда, ҳукм гирифтааст ва дар пайгарди байналмилалӣ қарор дорад.

Ёдовар мешавем, ки бори аввал нест ҳайати ягон давлат нишасти САҲА-ро тарк мекунанд. Пештар аз ин 23-юми сентябр ҳайати Тоҷикистон бо нишони эътироз аз иштироки намояндагони ҳизби мамнуи назҳати ислом нишастро тарк карда буд. Дар баёнияи ҳайати Тоҷикистон омадааст: “Ҳайати Тоҷикистон ба ҳайси узви комилҳуқуқи созмон аз ҳузури афроде, ки ҷиноят кардаанд ва дар ҷустӯҷуи байналмилалӣ қарор доранд ва дар нишасти созмон ширкат мекунанд, бисёр нигарон аст. САҲА аз ҳузури гурӯҳе аз онҳо, ки дар Тоҷикистон ҷиноятҳои сангин кардаанд, аз ҷумла амалҳои террористӣ анҷом додаанд ва дар ҷустӯҷу қарор доранд, бо таҳаммул рафтор кард, вале онҳо дирӯз хати сурхро гузаштанд ва мо зарур медонем, вокуниш кунем”.

Намояндаи Тоҷикистон онҳоро террорист номид ва гуфт, ки онҳо худро ҷабрдида нишон дода, мехоҳанд ҳаққи иқомат дар Аврупоро пайдо кунанд. Ба гуфтаи ҳайати Тоҷикистон иҷозат додани ин афрод ба нишаст, ки худро мухолифони Ҳукумати Тоҷикистон мехонанд, мухолифи усулҳои созмон аст ва ба обрӯи Созмони амният ва ҳамкории Аврупо латма мезанад.

Баҳманёр НОДИРОВ