Дар Қасри ҷавонони ба номи Лоиқ Шералии шаҳри Хуҷанд ҷаласаи навбатии Шурои кор бо ҷавонони назди раиси вилояти Суғд баргузор гардид. Дар кори он аъзои Шуро, муовинони раисони шаҳру ноҳияҳо, роҳбарони муассисаҳои олӣ ва миёнаи касбӣ, масъулини Раёсати кор бо ҷавонон ва варзиши вилоят, инчунин ҷавонони фаъол иштирок намуданд. Дар ҷаласа ду масъала, рафти иҷрои дастуру супоришҳои раиси Шурои миллии кор бо ҷавонони назди Президенти Ҷумҳурии Тоҷикистон Пешвои миллат муҳтарам Эмомалӣ Раҳмон ва тасдиқи нақшаи фаъолияти Шурои кор бо ҷавонони назди раиси вилояти Суғд барои соли 2025 мавриди баррасӣ қарор гирифт.

Бахтиёр Исматзода, сардори Раёсати кор бо ҷавонон ва варзиши вилоят вобаста ба масъалаи якум таъкид намуд, ки дар шаҳру ноҳияҳои вилояти Суғд барои фаъолияти ҷавонон, дастгирӣ ва ҳавасманд намудани олимони ҷавон, ҷалби ин қишри ояндасоз ба чорабиниҳои гуногун, аз ҷумла мусобиқаҳои варзишӣ шароити мусоид фароҳам оварда шудааст. Ба гуфтаи Б. Исматзода соли 2024 ва панҷ моҳи соли равон дар вилояти Суғд мулоқоту вохӯриҳо ва дигар чорабиниҳои маърифатӣ баргузор гардида, барои боз ҳам баланд бардоштани ҳисси ватандӯстӣ ва ифтихори миллӣ дар замири насли наврасу ҷавон тадбирҳои муҳим амалӣ гардиданд.

Баргузории Фестивали ҷаҳонии ҷавонон бо иштироки намояндагони беш аз 25 кишвари олам аз ҷумлаи тадбирҳои муҳим маънидод гардида, дар ин раванд ташкил ва баргузор гардидани мусобиқаҳои варзишӣ, конфронсу мизи мудаввар ва дигар чорабиниҳои маърифатӣ дар шаҳру ноҳияҳои вилоят барои мустаҳкам гардидани риштаи дӯстӣ миёни ҷавонон, табодули таҷриба замина фароҳам овард.

Давоми панҷ моҳи соли равон 500 мусобиқаҳои варзишӣ ва 400 машқи солимгардонии пагоҳирӯзӣ ташкил ва баргузор гардидааст ва ин тадбир дар самти оммавияти варзиш ва ҷалби ҷавонону наврасон ба ҳаёти солим мусоидат намудааст.

Дар идомаи кори ҷаласаи навбатии Шурои кор бо ҷавонон дигар баромадкунандагон аз таваҷҷуҳу ғамхориҳои пайвастаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, дастгирӣ ва ҳавасмандгардонии ҷавонон дар соҳаҳои мухталиф, татбиқи ҳадафҳои созанда вобаста ба боз ҳам беҳтар намудани шароити донишандӯзӣ, кору таҳсили ҷавонон ва дигар масъалаҳои мавриди назар андешаҳои худро баён доштанд.

Раҷаббой Аҳмадзода иброз дошт, ки таъсиси Шурои миллии кор бо ҷавонони назди Президент гувоҳи он аст, ки Пешвои миллат муҳтарам Эмомалӣ Раҳмон ба ҷавонон ҳамчун неруи пешбарандаи ҷомеа эътимоди хоса доранд. Дар асоси супоришҳои Сарвари давлат дар назди раисони вилоят ва шаҳру ноҳияҳо Шурои кор бо ҷавонон ташкил гардида, ҳадаф баррасии масъалаҳои муҳим, татбиқи ҳамаҷонибаи сиёсати давлатии ҷавонон, даъвати онҳо ба корҳои ободониву созандагӣ ва фароҳам овардани шароити муносиби кору таҳсил маънидод гардид.

Дар баробари баррасии масъалаҳо дар назди аъзои Шуро ва дигар шахсони масъул вазифаҳои мушаххас гузошта шуд. Аз ҷумла, дар самти баргузории озмунҳо доир ба баланд бардоштани сатҳи тарбияи ватандӯстии ҷавонон, баланд бардоштани сатҳи корҳои илмӣ - тадқиқотӣ ва дар истеҳсолот ҷорӣ намудани онҳо, ба роҳ мондани бозомӯзии кадрҳои омӯзгорӣ, такмили базаи моддию техникӣ, беҳтар намудани сифати фаъолияти илмии устодон, беҳтар намудани шароити иҷтимоии донишҷӯён, ҷоннок намудани фаъолияти ташкилотҳои ҷамъиятӣ - созмони ҷавонон, шӯрои духтарон, мунтазам ба роҳ мондани робита бо падару модарони донишҷӯён, ташкили парки технологӣ дар шаҳри Хуҷанд ва дигар масъалаҳои муҳим андешидани тадбирҳои иловагӣ муҳим дониста шуд.

Дар поёни кори Шурои кор бо ҷавонон нақшаи чорабиниҳо ва фаъолият барои давраи соли 2025 тасдиқ гардида, ба яқ қатор ҷавонони фаъол сипоснома ва туҳфаҳои хотиравии Мақомоти иҷрояи ҳокимияти давлатии вилояти Суғд тақдим гардид.