“Истифодаи нодурусти антибиётикҳо ба саломатии инсонҳо хатарнок аст. Истеъмоли онҳо бе таъиноти тиббӣ устувории зидимикробии онҳоро метезонад. Инфексияҳое, ки аз микробҳои ба антибиётикҳо устуворбуда ба вуҷуд омадаанд, дорои хусусияти мураккаб буда, табобаташон душвор аст”.

Ин нукта зимни баргузории як нишасти матбуотӣ дар Муассисаи давлатии “Маркази ҷумҳуриявии имунопрофилактика”-и Вазорати тандурустӣ ва ҳифзи иҷтимоии аҳолӣ ба муносибати “Ҳафтаи умумиҷаҳонии истифодаи дурусти антибиётикҳо”, ки аз 13 то 19-уми ноябр идома меёбад, зикр гардид.

Дар он Игор Поканевич, мутахассиси Ташкилоти Умумиҷаҳонии Тандурустӣ, Саид Давлатов, муовини сардори Муассисаи давлатии “Хадамоти назорати давлатии санитарию эпидемиологӣ”-и Вазорати тандурустӣ ва ҳифзи иҷтимоии аҳолӣ, Парвина Мухтарова, директори Муассисаи давлатии “Маркази ҷумҳуриявии ташаккули тарзи ҳаёти солим” ва дигарон иштирок доштанд.

Игор Поканевич зикр кард, антибиётикҳоеро, ки калонсолон истифода мебаранд, ба кӯдакон додан қатъиян дуруст нест.

Парвина Мухтарова, директори Муассисаи давлатии “Маркази ҷумҳуриявии ташаккули тарзи ҳаёти солим” иброз дошт, ки ҷиҳати баланд бардоштани маърифати тибии аҳолӣ соҳаи тандурустӣ бояд бо расонаҳои ахбори умум ҳамкориро зич ба роҳ монад. “Бояд ба мардум фаҳмонем, ки тарзи нодурусти истифодаи антибиётикҳо ба оризаҳои вазнин оварда мерасонад. Бинобар ин, донистаю надониста бе тавсияи табибон аз антибиётикҳо истифода набаранд” – таъкид кард номбурда.