Дирӯз, 20 июн, дар меҳмонхонаи “Ҳаят Реҷенсӣ”-и шаҳри Душанбе вобаста ба 20-солагии фаъолияти ташкилоти “Good neighbors International” дар Тоҷикистон чорабинӣ доир гардид.

Дар ифтитоҳи чорабинӣ намояндагони ташкилот баромад намуда, корҳое, ки дар тӯли бист соли фаъолият дар Тоҷикистон амалӣ намудаанд, маълумот доданд.

Гуфта шуд, ки 20 сол пеш соли 1998, ташкилоти “Good neighbors International” дар Тоҷикистон фаъолияташро оғоз намудааст. Дар ибтидои фаъолият кӯшишҳои асосӣ ба кумак кардан ба кӯдакони ятиммонда ва кӯдакони камбизоат равона карда шуда буданд, зеро ки дар он вақт Тоҷикистон дар натиҷаи ҷанги шаҳрвандӣ давраи мушкилро аз сар мегузаронид.

“Дар давоми даҳ соли аввал мо ба хонаи кӯдакон ва мактаб-интернатҳо кумак менамудем. Дар давоми 10-солаи дуюм мо ба таҳия намудани лоиҳаҳои иҷтимоие, ки ба инкишофи ҷомеа равона карда шудаанд, оғоз кардем. Имрӯз мо дар 5 минтақаи Тоҷикистон фаъолият намуда, ба 12 500 нафар кӯдак, оилаҳои онҳо ва ҷомеае, ки онҳо зиндагӣ мекунанд, кумак мерасонем”- таъкид гардид дар идомаи суханрониҳо.

Ташкилоти “Good neighbors International” соли 1991 дар Ҷумҳурии Корея таъсис ёфта, ба он аз ҷониби Шӯрои иҷтимоӣ ва иқтисодии СММ, Статуси Умумии Машваратӣ (UN ECOSOC) тақдим гардидааст. Ташкилоти мазкур дар 38 кишвари дунё фаъолият намуда, ба онҳое, ки ба кумак ниёз доранд, ёрии башардӯстона мерасонад.