12 август дар Литсейи №1-и шаҳри Қӯрғонтеппа бо мақсади пешгирии ҷавонон аз шомилшавӣ ба ҳизбу ҳаракатҳои террористӣ-экстремистӣ, тарбияи онҳо дар руҳияи худогоҳиву худшиносӣ, пешгирии хурофотпарастӣ, таҳкими ваҳдат ва сулҳу субот дар ҷомеа иҷрокунандаи вазифаи раиси шаҳри Қӯрғонтеппа Абдуалим Исмоилзода, сардори шуъбаи Вазорати корҳои дохилӣ дар шаҳри Қӯрғонтеппа, полковники милитсия Набиҷон Исозад, прокурори шаҳр Баҳриддин Сафарзода, раисони маҳаллаҳо, роҳбарони ташкилоту идораҳои шаҳр, падару модарон, ҷавонон ва имомхатибон бо сокинони шаҳр вохӯрӣ доир намуданд.

Дар вохӯрӣ оид ба масъалаи муноқишаҳои байнимактабӣ, ҷиноятҳои гурӯҳии ҷавонон, ба роҳҳои хато рафтани бархе намояндагони ин насли ояндасоз ва бемасъулиятии волидон нисбати тақдиру ояндаи фарзандон изҳори назар намуданд.

Абдуалим Исмоилзода дар суханрониаш иброз дошт, ки ҷавонон нерӯи тавонои давлат буда, бо дониши хубу аъло ва ахлоқи намунавӣ бояд ибрати дигарон бошанд ва дар роҳи бунёдкориву созандагӣ ва тарғиби тарзи ҳаёти солим аз дигар табақаҳои ҷомеа тафовут дошта бошанд: “Ҷо доштани амалу кирдорҳои ҷиноятӣ дар байни ноболиғону ҷавонон ва ба роҳҳои ғайриқонунӣ рафтани баъзеи онҳо воқеан боиси ташвиши аҳли ҷомеа гаштааст. Имрӯз бисёр дардовар аст вақте, ки мо аз даст доштани баъзе ноболиғону ҷавонон, хусусан мактаббачагону донишҷӯён дар содир намудани ҷиноятҳои вазнине, амсоли одамкушӣ, нашъаҷаллобӣ, дуздиву қаллобӣ ва авбошиву ғоратгарӣ ҳарф мезанем”, - афзуд ӯ.

Набиҷон Исозода оид ба масъалаҳои доғи ҷаҳони муосир ва вазъи ҳуқуқвайронкуниву ҷинояткорӣ миёни ноболиғону ҷавонон дар кишвар, алалхусус дар шаҳри Қӯрғонтеппа ибрози андеша намуда, қайд кард, ки “Насли калонсол, бахусус падару модарон ва нафароне, ки ба таълиму тарбия машғул мебошанд, бояд бо дарки баланди масъулият назоратро аз болои наврасону ҷавонон зиёд намуда, дар пешгирӣ намудани оқибатҳои фоҷеабору нангини шомилшавии онҳо ба ҳар гуна ҳизбу ҳаракатҳои тундрав бетараф набошанд”.

Прокурори шаҳр Баҳриддин Сафарзода аз муноқишаҳои байнимактабӣ изҳори нигаронӣ карда, иброз дошт, ки: “Яке аз масъалаҳои доғи рӯз, ки назари аҳли ҷомеа ба он нигаронида шудааст, ин муноқишаҳои гурӯҳии байни мактаббачагон мебошад”.

Инчунин дар баробари муҳокимаи масъалаҳои марбут ба ҳаёту фаъолияти ноболиғону ҷавонон, мавзӯҳои вобаста ба ҳолатҳои шомил гардидани ҷавонон ба ҳизбу ҳаракатҳои тундрав, пешгирии ҳодисаҳои дурӣ ҷустани наврасон аз таҳсил ва ба ҳар гуна амалу кирдорҳои хавфнок дар ҷомеа ва таҳкими ҳамкорӣ миёни мактабу оила ва мақомоти ҳифзи ҳуқуқ баррасӣ карда шуданд.

Умед МИРЗОЕВ, “ҶТ”