Омӯзгорӣ касби пуршараф буда, хеле хуб аст, ки имрӯз бонувон дар ин ҷода сарбаландона пайи фаъолиятанду саҳми худро дар баланд бардоштани савияи дониши наврасону ҷавонон мугузоранд. Ҳамзамон онҳо дар муассисаҳои гуногуни таълимӣ ба ҳайси роҳбар баҳри амалӣ намудани сиёсати маорифпарваронаи Ҳукумати кишвар дар талошанд. Дар зимн роҷеъ ба касби омӯзгорию рисолати омӯзгор бо Сурайё Неъматова, директори Литсей барои хонандагони болаёқати шаҳри Хуҷанд суҳбат намудем.

- Ҷиҳати тарбияи худшиносии миллии хонадагон дар муассиса кадом чорабиниҳои муфид роҳандозӣ гардидаанд?

- Худшиносии миллӣ ва арҷ гузоштан ба арзишҳои олӣ аз вазифаҳои аввалиндараҷа ва муқаддаси ҳар як шаҳрванд ба ҳисоб меравад. Дар муассиса ба тарбияи худшиносии миллии хонандагон аҳамияти ҷиддӣ дода мешавад. Дар асоси нақшаи тарбиявӣ дар соатҳои тарбиявӣ мавзӯъҳои алоҳида доир ба тарбияи худшиносии миллӣ ташкил ва баргузор мешавад. Ҳамчунин мизҳои мудаввар ва семинарҳои машваратӣ бомаром гузаронида шуда, тариқи ВАО ва шабакаҳои иҷтимоӣ тарғиб карда мешавад.

- Барои шумо ҳамчун зан-модар дар як вақт роҳбари муваффақ, ҳамсари хуб ва модари арзанда будан, мушкил нест?

- Дар як вақт ҳамчун зан – модар, роҳбар ва ҳамсари хуб будан мушкилӣ надорад, чунки пеш аз ҳама ҳамсарам ва волидонаш, ки худ зиёӣ ҳастанд, ҳамеша маро дастгирӣ менамоянд. Мо занҳо бояд бо пуштибонӣ аз сиёсати Ҳукумати мамлакат насли солиму хушахлоқ ва ватандӯсту масъулиятшиносро ба камол расонда, саъю талоши худро ба хотири пешрафту тараққиёти давлати соҳибистиқлоламон гузошта бошем.

- Ба андешаи шумо муносибати устоду шогирд бояд чӣ гуна бошад?

- Устод ҳамеша бояд кӯшиш кунад, ки вазифаи аввалиндараҷаи худро иҷро намояд. Вазифаи аввалиндараҷаи омӯзгор ин таълиму тарбияи хуб додан ба шогирдонаш аст. Рафтору кирдори омӯзгор барои шогирдонаш намунавӣ бошад. Муносибат, рафтору кирдори омӯзгор нақши муҳимро дар тарбияи насли нав-рас мебозад. Дар фаъолияти кориаш омӯзгор ҳеҷ гоҳ бояд ба шогирдонаш гапи қабеҳ нагӯяд, ҳамеша бо шогирдон муносибати хуб намояд. Омӯзгор ба ҳар як хонанда бояд аз рӯи рафтору кирдораш муносибати равонӣ дошта бошад.
Устод бояд роҳҳои муомила бо шогирдро донад ва аз идораи худ баромадани устод нишонаи сатҳи пасти касбияти ӯст. Аз ин лиҳоз, устод ҳамеша идеал бояд бошад, ки шогирдон ифтихор аз устоди хеш кунанд. Ҳеҷ вақт муаллим ҳуқуқи маънавӣ надорад, ки шогирдро дашном диҳад. Дар кадом сурате набошад, бояд устод роҳҳои муомила бо шогирдонро дошта бошад. Омӯзгор ҳамеша ифтихор аз касби хеш кунад ва содиқона касбашро дӯст дорад. Устоде, ки ба касби худ содиқ асту дар вақти дарс додан, маҳорати баландро дорост, эҳтиромаш нисбати шогирд баланд мешавад ва шогирдон низ мекушанд, ки дар дарси устоди донишманду бомаҳорат бо шавқу ҳавас иштирок намоянд.

- Бисёриҳо бар ин андешаанд, ки имрӯз обрӯи омӯзгор каме коста шудааст. Сабабашро дар чӣ мебинед ва чӣ гуна метавонем обрӯву нуфузи омӯзгорро дар ҷомеа баланд бардорем?

- Сатҳи саводнокии муаллим бояд баланд бошад. Бояд усулҳои нави таълим пурра омӯхта шавад. Омӯзгорон дар фаъолияти кориашон ҳатман аз воситаҳои аёнӣ ва таҷҳизотҳои муосири таълимӣ истифода намоянд. Ҳамчунин таҷрибаи пешқадами омӯзгорони дунёро истифода баранд. Аз рӯи андешаҳои дар боло зикр гардида, фаъолият намоем, обрӯву нуфузи омӯзгор дар ҷомеа баланд мегардад.

- Аз касбатон розӣ ҳастед? Агар “ҳа” бо кадом далел ва агар “не” бо кадом сабаб?

- Ман аз касби интихобкардаи худ розиям, чунки аз овони кӯдакиву наврасӣ касби омӯзгориро дӯст медоштам ва падару модари дуогӯям низ ҳамеша маро ба интихоби касби пуршарафи омӯзгорӣ ҳидоят мекарданд. Ифтихори хар як соҳибкасб мояи ранҷи пурмаҳсули ӯст, ки ба осонӣ ба даст намеояд.

- Соли сипаригардида толибилмони муассисаи шумо соҳиби шоҳҷоиза - гранти омӯзишӣ ба маблағи беш аз 2 миллион доллари амрикоӣ ва интихоби идомаи таҳсил дар 8 донишгоҳи кишвари Аврупову Амрико гардиданд. Шогирдонатон ба ин чиз чӣ гуна даст ёфтанд?

- Дар муассисаи мо бо ибтикори маъмурияти муассисаи таълимӣ таваҷҷуҳи хосса ва махсус ба омӯзиши забони англисӣ бо мақсади омӯзиши амиқи он равона карда шуда, дар ин самт бо барномаҳои махсуси таълимӣ ва дастурҳои таълимӣ ба хонандагон забони хориҷӣ таълим дода мешавад, ки самараи хуб ба бор оварда истодааст.

Лозим ба таъкид аст, ки танҳо дар соли хониши 2021-2022 хонандагони литсейи мо дар беш аз 13 олимпиадаи фаннии сатҳи ҷаҳонӣ дар кишварҳои Амрико, Туркия, Таиланд, Малайзия, Сингапур, Бразилия, Русия, Ҳиндустон, Олмон, Британияи Кабир ва Фаронса иштирок намуда, соҳиби 356 медали тилло, нуқра ва биринҷӣ гардидаанд.

Лозим ба зикр аст, ки дар соли хониши 2020-2021 аз 45 нафар хатмкунандагони Литсей барои хонандагони болаёқат дар шаҳри Хуҷанд 40 нафараш ба донишгоҳҳои бонуфузи кишварҳои Амрико, Британияи Кабир, Фаронса, Италия ва Русия дохил шуда, боқимонда 5 нафар дар донишгоҳҳои олии ҷумҳурӣ пайи таҳсиланд.