Ба ифтихори 22 – солагии Рӯзи Ваҳдати миллӣ дар шаҳри Хоруғ бо ширкати раиси вилоят ва Шурои Ҳаракати Ваҳдати миллӣ ва эҳёи Тоҷикистон Ёдгор Файзов, раиси шаҳри Хоруғ Кишвар Шамирӣ, роҳбарону намояндагони сохторҳои қудратӣ ва меҳмонони хориҷиву сокинони вилоят чорабинии тантанавӣ доир гашт.

Пеш аз оғози чорабинӣ роҳбарияти вилояту шаҳр, намояндагонӣ мақомоти иҷроияи маҳаллии ҳокимияти давлатӣ, собиқадорони меҳнат, масъулину кормандони Раёсати кор бо ҷавонон ва варзиш, роҳбарият ва омӯзгорони Донишгоҳи давлатии Хоруғ ба номи Моёншо Назаршоев, аҳли Ҳизби халқии демократии Тоҷикистон дар вилоят аз пеши донишгоҳ то Боғи фарҳангӣ – фароғатии шаҳр бо шиору овезаҳо, аксҳои Қаҳрамонони Ҷумҳурии Тоҷикистон, Парчаму Нишон ва дигар муқаддасоти миллӣ роҳпаймоӣ намуданд.



Ҳозирин аз намоиши молу маҳсулот ва ҳунарҳои мардумӣ дидан карда, баъди он раиси шаҳр К. Шамирӣ суханронӣ намуд. Ӯ қайд кард, ки дар воқеъ ташаббуси созанда, хизмати шоёну шоистаи Пешвои муаззами миллат муҳтарам Эмомалӣ Раҳмон буд, ки Созишномаи истиқрори сулҳ ва ризоияти миллӣ ба имзо расид ва миллати тоҷик сарҷамъу иттиҳод гашт. Ин таҷрибаи тоҷикон дар таърихи навтарини инсоният ҳодисаи нодиртарин буда, имрӯз ҳам дар ҷаҳон на ҳамаи кишварҳои олам аз он сабақ мегиранд.

Ба таъкиди муовини раиси Маҷлиси миллии Маҷлиси Олии Ҷумҳури Тоҷикистон Ёдгор Файзов аҷдодони мо ҳанӯз аз давраҳои пеш танҳо як сарвати бебаҳоро гиромӣ доштанд ва он тинҷию оромӣ ва ваҳдати комил аст. Бинобари ин зарур аст, ки ҳамаамон ваҳдатро беолоиш нигоҳ дошта, ба наслҳои дигар расонем.

Ба ҳозир барномаи рангини консертӣ  бо иштироки беҳтарин ҳофизон, санъаткорони вилоят пешкаш гардид.