Дирӯз - 29 октябр дар шаҳри Сеули Кореяи Ҷанубӣ маросими ҷамъбасти соли Конфедератсияи футболи Осиё доир шуд. Дар ин чорабинӣ Ассотсиатсияи футболи Осиёи Марказӣ беҳтарин Ассотсиатсияи минтақавии сол дар Осиё эътироф гардид. Дар ин бораи Федератсияи футболи кишвар хабар дод.

Пас аз интихоб шудани президенти Федератсияи футболи Тоҷикистон муҳтарам Рустам Эмомалӣ ба симмати роҳбарии Ассотсиатсияи футболи Осиёи Марказӣ ин маротибаи дуюм аст, ки Конфедератсияи футболи Осиё Ассотсиатсияи футболи Осиёи Марказиро беҳтарин Ассотсиатсияи минтақавии сол эълон мекунад.

Бояд изҳор дошт, ки Ассотсиатсияи футболи Осиёи Марказӣ (CAFA) соли 2015 таъсис ёфта, ҷавонтарин Ассотсиатсияи минтақавии Конфедератсияи футболи Осиё маҳсуб меёбад.

Ба Ассотсиатсияи футболи Осиёи Марказӣ (CAFA) федератсияҳои футболи шаш кишвар – Тоҷикистон, Афғонистон, Эрон, Қирғизистон, Туркманистон ва Ӯзбекистон шомиланд. Қароргоҳи CAFA дар шаҳри Душанбе ҷойгир аст.

Ҷасури ҚИЁМИДДИН, "ҶТ"