Имрӯз Шурои воситаҳои ахбори оммаи Тоҷикистон зимни ҷаласаи ҷамъбастии Шуро рӯзномаи “Ҷавонони Тоҷикистон”-ро беҳтарин нашрия ҷиҳати риояи меъёрҳои ахлоқии фаъолияти журналистӣ эълон карда, рӯзномаро бо Сипоснома қадрдонӣ кард.

Ҷаласа дар меҳмонхонаи “Хилтон”-и шаҳри Душанбе доир гардида, дар он натиҷаҳои лоиҳаи “Мониторинги расонаҳои кишвар ҷиҳати риояи “Меъёрҳои ахлоқии фаъолияти журналистӣ” муаррифӣ гардид.

Зимни ҷаласа гуфта шуд, ки ин монитроринг аз сӯи Шурои ВАО-и Тоҷикистон бо дастгирии Созмони амният ва ҳамкорӣ дар Аврупо аз 1 июли соли 2024 оғоз шуда то 30 ноябр идома ёфт. Мониторинг 11 нашрияи чопии серхонанда ва 2 сомонаи иттилотии кишварро фаро гирифта, дар ҷараёни гузаронидани он коршиносони касбӣ аз ҳисоби рӯзноманигорон ва ҳуқуқшиносони ҳирфаӣ ҷалб гардидаанд.

Аз рӯи натиҷаҳо рӯзномаи “Ҷавонони Тоҷикистон” дар риояи меъёрҳои ахлоқии фаъолияти журналистӣ беҳтарин хонда шуда, дар ин баробар нашрияи “Омӯзгор” ва АМИТ “Ховар” низ бо сипосномаҳои ин шуро қадрдонӣ шуданд.

Ҳамчунин, зикр шуд, ки дар нашрияҳои дигар ба ҳисоби миёна дар 5 моҳ 14 маротиба ва дар 1 моҳ тақрибан 3 маротиба бандҳои гуногуни “Меъёрҳои ахлоқии фаъолияти журналистӣ дар Тоҷикистон” нақз шудааст. Беш аз ҳама бандҳои 2.2: “Матлабҳое, ки ба хотири манфиатҳои тиҷоратӣ ва реклама, ё ҳимояи манфиатҳои гурӯҳҳо ва шахсони алоҳида интишор мешаванд, бояд комилан аз дигар мавод фарқ карда, ишораи махсус дошта бошанд”, 3.3: “Ба ҳуҳуқи моликияти зеҳнӣ эҳтиром гузошта, аз асардуздӣ худдорӣ ва ҳангоми иқтибосу бознашр ба манобеъ ишора намоянд ва банди 3.7: “Ҳангоми интишори матолиб аз забони хушунат ва суханони нафратангез истифода накунанд, нақз шудааст.

Бояд гуфт, ки ҳадаф аз ташкили “Мониторинги расонаҳои кишвар ҷиҳати риояи “Меъёрҳои ахлоқии фаъолияти журналистӣ” муайян намудани ҳолатҳои нақзи меърёҳои ахлоқи касбӣ дар нашрияҳо ва сомонаҳои интернетии кишвар ва пешниҳоди тавсияҳо барои бартарафсозии камбудиҳои ҷойдошта мебошад.

Сайёраи ҚИЁМИДДИН, “ҶТ”