Имрӯз дар Донишгоҳи технологии Тоҷикистон бахшида ба Рӯзи ҷавонон ва Рӯзи байналмилалии футбол чорабинии тантанавӣ таҳти унвони “Ҷавонон - инноватсия ва рушди иқтисоди рақамӣ дар замони муосир” доир шуд.

Дар ин бора маркази таҳлил ва иттилооти Кумитаи кор бо ҷавонон ва варзиш хабар додааст.

Бино ба иттилоъ, дар чорабинӣ Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Раҳмонзода Зоир Файзалӣ, ректори Донишгоҳи технологии Тоҷикистон, инчунин ҳайати устодон, кормандон ва донишҷӯёни Донишгоҳ ширкат карданд.

Ибтидо меҳмонон ва иштирокдорон аз намоишгоҳи дастовардҳои илмиву тадқиқотӣ, инноватсиониву ихтироъкорӣ ва варзишии донишҷӯёну устодони Донишгоҳ, ки дар саҳни донишгоҳ ба маъраз гузошта шуда буд, боздид карданд. Баъди боздид 29 нафар устодони собиқадор, ки дар тарбияи насли наврас саҳми назаррас гузоштаанд, аз ҷониби Раёсати донишгоҳ бо гулдаста ва табрикномаҳо бахшида ба Рӯзи ҷавонон қадрдонӣ шуданд.

Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон зимни баромади хеш дар чорабинӣ ҷавононро ҳамчун неруи пешбарандаи ҷомеа ситоиш намуда, иброз дошт: “Ҳукумати Ҷумҳурии Тоҷикистон таҳти роҳбарии Пешвои миллат муҳтарам Эмомалӣ Раҳмон ҳамеша сиёсати давлатии ҷавононро дастгирӣ намуда, барои рушди ҳамаҷонибаи онҳо тамоми шароити заруриро муҳайё кардааст. Маҳз тавассути дастгириҳои Пешвои миллат аст, ки имрӯз ҷавонони мо дар арсаи илм, инноватсия, варзиш ва фарҳанг фаъолона муаррифгари Ватани худ мебошанд”.

Тибқи иттилоъ, дар анҷоми қисми расмии чорабинӣ як қатор устодон ва донишҷӯёни фаъол бо ифтихорномаҳо, сипосномаҳо ва дипломҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Вазорати маориф ва илми Ҷумҳурии Тоҷикистон ва Донишгоҳи технологии Тоҷикистон қадрдонӣ шуданд.

Дар идома, инчунин, маросими ҷоизасупории мусобиқаи "Футболи хурд", ки ба муносибати Рӯзи ҷаҳонии футбол ва Рӯзи ҷавонон миёни кормандон, омӯзгорон ва донишҷӯёни Донишгоҳ ҷиҳати ба даст овардани "Ҷоми ректор" баргузор шуда буд, доир гардида, ғолибон бо диплом, медал, ҷом ва мукофотпулӣ қадрдонӣ гардиданд.

Пешкаш гардидани барномаи фарҳангӣ-фароғатии ансамбли “Зуҳал”-и Донишгоҳ анҷомбахши чорабинӣ гардид.

“ҶТ”