Рӯзҳои 22 ва 23 октябри соли равон дар Варзишгоҳи марказии ҷумҳуриявии шаҳри Душанбе бозиҳои даври сеюми марҳилаи гурӯҳии Лигаи қаҳрамонҳои дуюми Осиё-2024/25 бо иштироки бошгоҳҳои Тоҷикистон баргузор мегардад. Дар ин бора Федератсияи футболи кишвар хабар медиҳад.

Тибқи иттилоъ, 22 октябр қаҳрамони Тоҷикистон - бошгоҳи “Истиқлол”-и шаҳри Душанбе дар гурӯҳи “С” дастаи “Ал-Ваҳдат”-и Урдунро қабул мекунад. Бозии мазкур соати 19:00 ба вақти Душанбе оғоз мешавад.

Дар ин раванд, дастаи дигари кишвар “Равшан”-и Кӯлоб рӯзи 23 октябр дар доираи бозии даври сеюми гурӯҳи “А” дар Душанбе бо “Трактор”-и Эрон вориди майдон мегардад. Ин бозӣ низ соати 19:00 ба вақти маҳҳалӣ шуруъ мешавад.

Чуноне ки хабар доданд, нахуст, бояд ин бозӣ дар Ҷумҳурии исломии Эрон баргузор мешуд, аммо бошгоҳҳо табодули давр карданд. Дар назар аст, ки даври чоруми марҳилаи гурӯҳӣ рӯзи 6 ноябр дастаҳои “Трактор” ва “Равшан” байни ҳам дар Табрез қувваозмоӣ кунанд.

Ҷасури ҚИЁМИДДИН, "ҶТ"