Дар нимсолаи якуми соли 2024 ба кишвар дар ҳаҷми 783,8 ҳазор тонна маҳсулоти нафтӣ ва гази моеъ ворид гардидааст, ки нисбат ба ҳамин давраи соли 2023, дар ҳаҷми 73,5 ҳазор тонна ё 10,3% зиёд мебошад.

Дар ин бора Далер Ҷумъа, вазири энергетика ва захираҳои оби ҷумҳурӣ зимни нишасти хабарии ин ниҳод иттилоъ дод.

Ба таъкиди вазир дар ин давра воридоти гази табиӣ аз Ҷумҳурии Узбекистон ба Ҷумҳурии Тоҷикистон 156,5 млн. м3-ро ташкил додааст. Ин шумора низ нисбат ба ҳамин давраи соли гузашта 57,6 млн. м3 зиёд мебошад.

- Аз Федератсияи Русия ба ҷумҳурӣ 524,2 ҳазор тонна маҳсулоти нафтӣ ворид шудааст. Аз ҷумла, бензини автомобилӣ 236,6 ҳазор тонна, сӯзишвории дизелӣ 223,2 ҳазор тонна, сӯзишвории реактивӣ 22,7 ҳазор тонна, мазут 62 тонна, битум 27,9 ҳазор тонна, равғанҳои молиданӣ 5,4 ҳазор тонна ва гази моеъ 8,2 тонна, - гуфт Далер Ҷумъа.

Таъкид гардид, ки воридоти маҳсулоти нафтӣ нисбат ба ҳамин давраи соли гузашта 65,6 ҳазор тонна ё 14,3% зиёд буда, 54% иҷрои нақшаи тавозуни индикативиро ташкил медиҳад.

Сайёраи ҚИЁМИДДИН, “ҶТ”