Сар аз 7-уми ноябри соли 2025 Бозиҳои Ҳамбастагии Исломӣ дар шаҳри Риёзи Арабистони Саудӣ, таҳти сарпарастии Ассотсиатсияи варзишии ҳамбастагии исломӣ (ISSA) оғоз мегардад, ки Тоҷикистонро 69 варзишгар намояндагӣ мекунад.

Рақобатҳои варзишгарон қарор аст то 21-уми ноябри соли 2025 идома ёбад.

Доир ба сафарбар намудани варзишгарон ба ин мусобиқа 1 -уми ноябри соли 2025 Зулфиқор Гулаҳмадзода – бо ҳайати масъулин, мураббиён ва варзишгарони Ҷумҳурии Тоҷикистон, ки ҷиҳати иштирок дар шашумин Бозиҳои Ҳамбастагии исломӣ ба шаҳри Риёзи Шоҳигарии Арабистони Саудӣ сафар менамоянд, мулоқот кард.

Тоҷикистонро дар ин мусобиқа 134 нафар намояндагӣ мекунанд, ки аз ҷумла 54 нафар масъулину мураббиён, 7 нафар ҳайати роҳбарикунанда ва 69 нафар варзишгар аз рӯи 12 намуди варзиш мебошанд.

Мадина Қурбонзода – барандаи медали тиллои Чемпионати Осиё миёни бонувон аз риштаи ҷудо ва Эмомалӣ Нуралӣ – ноибқаҳрамони Чемпионати ҷаҳон оид ба ҷудо миёни калонсолон ҳамчун парчамбардорони дастаи мунтахаби Ҷумҳурии Тоҷикистон дар маросими кушодашавии шашумин Бозиҳои Ҳамбастагии Исломӣ интихоб шудаанд.

Бори дуюм аст, ки мизбонии баргузории ин мусобиқаро Арабистони Саудӣ бар уҳда мегирад. Дар мусобиқаи мазкур варзишгарони 57 кишвар аз рӯи 19 намуди варзиш иштирок мекунанд.

Дар охирин Бозиҳои ҳамбастагии исломӣ дар шаҳри Қунияи Туркия варзишгарони тоҷик ба гирифтани 3 медали нуқра ва 5 биринҷӣ мушарраф гардида буданд.

Яҳё МАҲМАДНАБИЕВ, “ҶТ”